Nadela: Way datu, way pobre

Friday, February 10, 2012

KOREDAS ang tanan sa miaging Lunes sa hapon. Ang tanan pulos gibati og kahadlok. Nahadlok nga mamatay mao nga kutob sa mahimo nidagan padung sa bukid sa pamasin nga di maabtan sa tubig.

Mao ni ang kataw-anan nga bahin sa salida sa maong petsa, tungod sa pasiatab ug pangilad sa uban daghan ang nahinayak og dagan. Di tiaw ang kahadlok nga ilang gibati.

Have something to report? Tell us in text, photos or videos.

Daghan ang naluya, daghan sab ang nagpa ospital. Resulta kini sa sayop nga inpormasyon o gituyo pagsayop aron lang makahimo og kadaut sa iyang isig ka tawo.

Sa kinatibuk-an ang salida niadtong Lunes bisan kung dakong sayop og usa ka krimen, naghatag kanato sa tinud-anay nga hulagway nga panahon sa katalagman, way datu, way pobre, patas ang tanan. Kay sila nga nagkabuang og dagan nag gikan sa nagkadaiyang hut-
ong sa katilingban.

Ambot og ngano sa usa lang ka pamilok ang pobre ug datu nagkauban sa karsada usa ra ang tumong maluwas gikan sa gipanghadlok nga trahedya. Ang asoy sa akong mga apohan, klaro kaayo nga sa nilabay nga ikaduhang gubat sa kalibutan, koredas gihapon ang tanan kabus og adunahan.

LEKSYON

Daghan ang leksyon nga ang atong makat-onan sa salida sa niaging Lunes. Sayop man tuod ang gipakatap nga inpormasyon, apan nahimo ning sukdanan kong unsa kita kaandam, kong unsa ka aktibo ang gobyerno pagpawong sa bisan unsang binuang nga estorya diha sa kadalanan.

Pananglit natinuod ang binuang nga estorya, duna bay kapabilidad ang gobyerno pagssapupu sa nanglutaw og nagpusnga nga katawhan. Sama sa gihimo sa Japan, ready ba ang kahimanan sa gobyerno pagluwas sa mga luwasonon o kutob nalang sa pag-ihap sa mga nangamatay human sa trahedya. Wa man gani masanta ang pagpakatap sa tabi tabi labot sa tsunami, pagpaminus pa kaha sa epekto niini kong nahinayon pa? 

MONITORING

Wa gyu’y naghisgut og mga paagi unsaon pagsanta ang sayop nga mga inpormasyon labot sa usa ka kalamidad nga taliabot. Ang kanunay nga gihisgutan kaniadto mao ra ang mga pamaagi unsaon pagpatuman ang search and rescue operation.

Ambot kong nganong nataligam-an kini nga unta ang komonikasyon kabahin man sa dakong bahin pagluwas og kinabuhi. Mao nga nanggawas dayon kining pag gamit sa mga electronic billboard pagpadangat og mga inpormasyon sa higayon dunay kalamidad nga moabot o naabot na gyud.

Gusto nako iapil og sugyot nga kadtong way mga cellphone og layo ra sa billboard, unta ang barangay mangita og paagi unsaon nga mapaabot ang gikinahanglan nga inpormasyon.

Ang gihimo sa Barangay Suba ug Pasil pagbutang og mga trompa sa posti sa kuryente ehemplo  sa usa ka aktibong panghunahuna aron mapugngan ang dakong perdisyon sa matag katalagman nga moabot. Nganong di man nato ni sun-on?