Diola: Kutis Tabunon

Saturday, February 11, 2012

Fr. Carmelo O. Diola, SSL
Mao Diay

BINASI sa Lev 13:1-2,44-6; Salmo 32; 1 Corinto 10:31-11:1; ug Marcos 1:40-45

Have something to report? Tell us in text, photos or videos.

Ug miduol kaniya ang usa ka sanlahon, nagpakiluoy kaniya [ug nagluhod] ug nag-ingon kaniya, ‘‘Kon buot ka, makahimo ka paghinlo kanako.’’

Ania na ang Takbo Maharlika sa Digos City, Davao del Sur. Amo nang gilabyan ang Davao del Norte ug Davao City. Daghandaghang kabag-ohan ang among namatikdan sa among mga naagian. Dili mabinta­haan ang mga kalsada niining mga lugaraha. Imbis na 30% para sa proyekto ug 70% gibulsa, morag nabali na. Hinayhinay basta kanunay.

Usa sa among ginahis­gotan sa forum mao ang pagkamasinahon isip usa sa pito ka mga punoang sala. Diha sa bibliya ang pagkamasinahon kun ‘‘envy’’ gilangkob sa pulong ‘‘ngil-ad og mata’’ kun ‘‘evil eye.’’ Nganong ‘‘ngil-ad og mata’’ (o maayo pa ‘‘tinan-awan’’) man? Tungod ka yang ka­nunayng makit-an sa tawo nga masinahon mao ang mga gasa nga anaa sa uban apan wala kaniya. Ang mga gasa nga anaa kaniya dili niya panumbalingon.

Sa ato pa, ang tawo nga masinahon dili kontento ug dili mahimutang. Kanunay lamang mangom­parar. Dili maantigong malipay ug mopasalamat.

Isip usa ka katawhan, kitang mga Pilipino gitudloan nga mahimong masinahon. Lakip kini sa atong ‘‘colonial mentality’’ diin ang panit nga tabunon wala ilha nga maanindot kay kuno mas nindot ang puti og panit. Suma daghan pa ang nauto sa pagpalit og sabon nga makapaputi sa panit.

Sa atong ebanghel­yo ang pagkasanlahon mikabat sa mga nagkalainlaing sakit sa panit sama sa noka ug uban pa. Dili lamang kini ang pagkasanlahon nga nga mokaon sa panit hangtod nga mawala ang ilong o dunggan.

Ang mga sanlahon gisalikway sa uban kay kuyawan man sad sila nga matakdan. Kanunay kini sila nga mag-inosara o magkahugpong sa ilang mga kaubang sanlahon. Sa ilang paglakaw ipasinggit sila aron pagpaila sa ilang mga kaugalingon nga sanlahon, aron makapahilayo ang uban.

May pagkasanlahon pod kitang mga Pilipino. Kini nagsugod sa atong pagtan-aw sa atong kau­ga­lingon. May mga panultihon kita nga ‘‘only in the Philippines’’ ug kusog kitang mobiaybiay sa kaugalingon.

Kinahanglan bag-ohon ni nato nga kinaiya kay daghan kita og mga hiyas nga matabonan kon paandayonan nato ang kinaiya nga mobiaybiay sa kaugalingon. Tinuod aduna kita mga ‘’sanla’’ apan mas daghan ang atong mga hiyas.

Ubay-ubay na ang among mga nakaila sa Takbo Maharlika: mga pulis, kasundalohan, mga estudyante, magtutudlo, mga opisyales sa baranggay, ug uban pa. Daghan kanila hilom lang ug walay daghan sulti.

Nakita namo ang usa ka katawhan nga nagapanaw padulong pagkatibuok nga nagasugod diha sa kahiladman, sa pag-ila sa atong pagkahalangdon atubangan sa Dios.