Editoryal: Way pakabana

Saturday, February 11, 2012

BAHA ug landslides mao ang duha ka mga katalagman nga komon kaayo nga moigo dinhi sa nasod.

Bag-o pa lang sa panumdoman sa mga Pinoy ang grabeng baha nga miigo sa mga siyudad sa Iligan ug Cagayan nga nikalas og gatusan ka mga kinabuhi ug nidaot og binilyon nga mga kabtangan.

Have something to report? Tell us in text, photos or videos.

Gikahadlukan usab nga kapin sa 100 ang nangamatay sa linog sa lalawigan sa Negros Oriental.

Ang mao nga mga dapit gitumbok na nga kuyaw sa landslides base sa geo-hazard mapping nga gihimo sa Mines and Geo-Sciences Bureau (MGB).

Apan ang nakapait kay daghan sa local govern­ment units ang wa kaayo magpakabana sa mga pahimangno sa mga eksperto. Karon, ang mga pahimangno sa nangaging katuigan anam-anam nang nahitabo, natinuod.

Unta, maminaw na ang local nga mga opisyal aron malikayan nga duna pay dugang mga kinabuhi nga makalas taliwa ning sunodsunod nga mga katalagman nga niigo sa nasod.

Daghan pang mga dapit sa nasod ang gitumbok nga kuyaw apan sa gihapon bungol ang kagamhanan ug katawhan. Karon, nag-ung-ung ang mga katalagman nga naghuwat nga mahitabo.

Pila pa kaha ka mga kinabuhi ang gikinahanglang makalas una pa molihok ang kagamhanan alang sa pugsanay nga pagpabalhin sa mga tawo gikan sa mga dapit nga makuyaw?

Hinuon, batasan na man sa kadaghanan nga una pa manguros kon moigo na ang kilat.