Mongaya: Mga biktima sa panahon ni Merci

Saturday, February 11, 2012

NILUTAW na karon nga kadto diayng 18 ka mga kawani sa Syudad sa Lapu-Lapu, lakip si kanhi mayor ug karon kongresista Boy Radaza, biktima lang sa panahon ni kanhi presidente Gloria Macapagal-Arroyo ug kanhi ombudsman Merceditas Gutierrez.

Ang nakapait kay duha kanila nangamatay na intawon nga wa makaabot karong pana­hona nga wa na sa poder si Arroyo ug Gutierrez ug nag-atubang og impeachment trial ang ilang kaalyado sa Korte Suprema nga si Chief Justice Renato Corona.

Have something to report? Tell us in text, photos or videos.

Di lang mga dagkong isyo sa panahon ni Arroyo, Gutierrez, ug Corona ang gipangtuki karon kon pangurakot ang atong hisgutan. Dinhi sa Sugbo ug sa Ilo-ilo, klarong nausab pud ang direksyon sa hangin kay ang ilang tawo diha sa Visayas Ombudsman nga si Assistant Ombudsman Virgie Palanca-Santiago na man ang nag-atubang og mga kaso.

Usa sa mga kaso nga iyang giatubang karon mao kining gisang-at sa mga opisyal ug kawani sa Syudad sa Lapu-Lapu nga giingong nabiktima sa mga kalaki ni Santiago kaniadtong naghari pa si PGMA ug si Gutierrez.

Atong klaruhon nga bisan didto sa Syudad sa Ilo-ilo, gituki na ang kalambigitan ni Virgie ug ni Merceditas kay bisan og ang iyang titulo assistant ombudsman, wa man kini sa plantilla sa opisina sa Visayas Ombudsman.

Gihimo lang diay kadto aron putlan sa pako si Visayas Ombudsman Pelagio Apostol nga di tawo ni Gutierrez niadtong panahona. Sila si Merci ug Virgie ang perming mag-miting.

Ubos sa ilang paghari sa opisina sa Ombudsman, ni-endorse kini si Santiago sa usa kintahay anti-graft group sa Syudad sa Lapu-Lapu nga nisang-at og kaso batok sa mayor niadtong tungora nga si Boy Radaza ug mga 17 ka mga kawani tungod sa giingong overpriced computers.

Kwestyonable kadto kay ang lider sa grupo nga ang negusyanteng si Efrain Pelaez gipaninglan man diay sa syudad og mga P4 milyones nga buhis. Nagplano sab kining modagan sa pagka mayor.

Nagpabungol-bungol sab kini si Santiago sa reklamo nga si Pelaez nigamit sa logo sa Ombudsman sa iyang mga sulat.

Karon lang bag-o nako nahibaw-an nga duna sab diay ingon niining kaso didto sa Ilo-ilo ug ang iya ra ba diayng gigukod niadtong panahona mao ang mga Tupas as in si Kong. Niel Tupas, ang prosecutor karon sa impeachment batok kang Chief Justice Corona.

Dugay-dugay gyud nga nag-antos ang ilang gipangkiha ug karon lang sila nakahunat sa pagkiha batok kang Santiago nga nawala na ang mga kapit niini didto sa Manila.

Ang luoy lang kay wa na makaapil kanila ang duha nga si city attorney Vincent Joseph Lim ug acting city engineer Fernando Tagaan Jr. sa Syudad sa Lapu-Lapu kay namatay na intawon nga wa makakitag hustisya sa nahitabo kanila.

Alang kanako, kining nahitabo sa duha nakadugang sa kalapasan ni Santiago batok sa iyang mga biktima ug sa katilingban.

Panic sa Sugbo

Di ko makasabot kon unsang klaseng bakukang ang nisulod sa ulo niining duha nga maoy nagsugod sa paghadlok sa mga Sugboanon duha ka oras human giuoyog kita sa 6.9 magnitude nga linog.

Mga opisyal man unta kini sila ug unta nakahibawo sila nga kining tsunami alert 2, basi sa giesplikar sa Phivolcs, da­kong bawod lang nga moabot og usa ka metro ang gitas-on.

Dayon, lisod hunahunaon kon unsaon sa tsunami pag-abot sa Syudad sa Sugbo kon ang epicenter sa linog didto nahitabo sa isla sa Negros.

Mga opisyal man unta kini sila sa barangay samtang usa kanila sakop sa media ug angayang mas nakahibawo kon unsay tinuod ug saktong buhaton. Hinuon, basin wa gyud nila tuyoa kay sila usab nahadlok bunga sa ilang kaignorante ug kakulang sa pagpaminaw pagtarong sa balita nga gikan sa Phivolcs.

Basin gyud nuon nga makalibre sila basi sa depensa nga ignorante sila kon unsay saktong buhaton.

(politika2013.wordpress.com)