Nalzaro: Walay panic kontidal wave pa unta

Saturday, February 11, 2012

SO, gikiha na sa kapulisan ang usa ka radio blocktimer nga maoy gitumbok nga responsable sa pagsinggit og tsunami human mo-igo ang 6.9 magnitude nga linog niadtong Lunes nga maoy naka-panic ug nakamugna og kaguliyang sa katawhan. Si Danilo ‘Danny’ Cogtas, nag-atubang og kasong public disturbance base sa Article 153 sa Revised Penal Code. Criminal offense kini ug nagtangag kini og multa nga P1,000 o ba kaha silot nga pagkabilanggo gikan sa usa ngadto sa unom ka buwan.

Aw, gamay ra nang multa Bay Danny. Ang mga saksi mitumbok kang Cogtas nga maoy misinggit og tsunami nga naggamit og megaphone samtang nagsakay og motorsiklo diha sa Pasil.  Pero ang tsunami scare nahitabo usab sa kinapusuran mismo sa dakbayan, didto sa pier area ug Mandaue. Nanagan god ang taga Mandaue kay ang tubig diha na kuno sa Park Mall. Ayaw kog ingna si Cogtas gihapon ang responsable ato? Bisan didto sa probensiya sama sa Barili, Carcar ug Dumanjug namakwit man sab ang mga tawo gumikan sa tsunami.

Have something to report? Tell us in text, photos or videos.

TEXT MESSAGES

Ang usa sa mga naka-ingon nganong ingon niadto nag-panic ang katawhan gumikan sa pagkatap sa text messages. Unya ang makadawat ipasa sa ilang mga ka-textmates.
Bisan ako daghan kaayo ko og messages nga nadawat. Kay ang tsunami mi-igo na sa SRP, kay ang tubig diha sa Fuente Osmeña. Kay mihubas ang dagat sa kalungsuran.
Dili man to mag-panic ba ang katawhan kon tidal wave pa ang gigamit nga termino ug dili tsunami. Bwahaha.

Gumikan sa tsunami nga miigo sa Japan niadtong miaging tiug nga giunhan og makusog nga linog ug ang didto usab sa Vietnam, nasulod naman god sa huna-huna sa katawhan ang maong matang sa katalagman. Busa gamay’ng kasikas lamang, na-alerto dayon ang katawhan. Labi pa kay morag una kadtong nasinati ang gikusgon sa maong linog dinhi. Pero maayo to nga dry run o exercise kon moabot na gyud ang tinud-anay katalagman. Simbako languyon pito ka lawod.

KOOPERASYON

Tan-awa gumikan sa maong kataw-anan nga kasinatian, mahan-ay na ang klarong kooperasyon ug koordinasyon sa nagkalain-laing ahensiya sa kagamhanan. Gani si Mayor Mike Rama gusto man nga adunay command center nga awtomatik nga tukuron kon adunay mga katalagman. Ang mga ahensiya sa gobiyerno nga wala untay pagpakabana sa mga ingon niini, karon aduna na.

Ang militar, kapulisan, DSWD, DOH, ug uban pa atoa gayod sa mga lugar sa Negros Oriental nga grabeng naapektuhan sa maong linog. Nagpadala gayod og manpower didto aron mangunay pagtabang. Dinhi nato masukod kon unsa gyud kita pagkamapinangga-on sa atong isig kaingon panahon sa katalagman.

(bobby.nalzaro@yahoo.com)