Barrita: Kahayag sa tumoy sa tunnel

Sunday, February 12, 2012

NIPASAKA si Rep. Cutie del Mar og usa ka balaudnon (House Bill 192) alang sa pagtukod og usa ka tunnel nga magsubay ilawom sa dagat ug magkonektar sa syudad sa Sugbo ug sa lungsod sa Cordova.

Ang tunga sa kilometro nga undersea tunnel sumpayan og coastal road gikan sa Cordova paingon sa syudad sa Lapu-Lapu.

Have something to report? Tell us in text, photos or videos.

Madayon ba kaha ni no?

***

Makapangutana kita kay karon pa lang gani nga balaudnon pa kini, duna nay mga pundok nga nisaway ug nisupak sa pagtukod sa maong undersea tunnel gikan sa syudad sa Sugbo ngadto sa Cordova.

Ang nisupak sa duha ka mga bag-ong flyover ni Congresswoman del Mar mao sab ang nisupak sa undersea tunnel.

Makakita pa kaha ni sila sa kahayag sa tumoy sa tunnel kon way tunnel?

***

Ang nahitabo karon nga samtang dunay mga opisyales sa kagamhanan nga kugihan nga mangitag mga proyekto, dunay pundok nga nagsigig supak ug baraw sa maong mga proyekto.
Hain kaha ka maayo kon kini sila maoy papangitaon og mga proyekto?

Kon diha na ni sila sa pagtukod sa duha ka mga taytayan nga nagdugtong sa mga isla sa Sugbo ug Mactan, unya ilang napugngan ang pagtukod niini, bugsay-bugsay unta ta karon paingon sa Opon.

***

Hangtod karon, mao gihapoy gisaw-an ug gisumsuman ang mga estorya bahin sa nangakugang sa sayop nga taho nga naigog tsunami ang syudad sa Sugbo.

Duna nakakita nga ang uban diay nga nanagan, didto nangatkat sa mga skywalk ug mga flyover dinhi sa syudad.

Angay gyud diay nga dugangan og tukod og mga flyover sa syudad aron dunay kabakwitan ang mga tawo simbako kon dunay tsunami.

***

Ang nisupak sa mga flyover mas nipabor sa road widening aron pagsulbad sa kahuot sa trapiko dinhi sa syudad sa Sugbo.

Apan sumala pa ni Director Pedro Herrera Jr. sa Department of Public Works and Highways (DPWH) 7, ang dugang duha ka mga bag-ong flyover sa syudad nga naglakip na og road widening.

Karon, ang road widening na sab maoy gibirahan sa usa ka international architect nga ginganlan og Senen Antonio.

Matod pa niya, “Road widening is the knee-jerk reaction to congestion. It’s fallacy.

It is a proven concept called induced traffic that results to induced demand.”

Unsaon ta na man lang ni karon, maghuwat na lang tang manglupad na unya ang mga sak­yanan?