Editoryal: Bisaya nga santos

Sunday, February 12, 2012

DAKONG garbo natong mga Bisaya, labi na sa mga sakop sa mayoriya nga simbahang Romano Katoliko, ang nag-ung-ong nga pagkahimo nga unang Bisaya nga santos -- si Blessed Pedro Calungsod.

Taas ang proseso sulod sa pipila ka tuig nga pagtuon, pagtuki ug pagsuway sa mga milagro sa dili pa ideklarar ang usa ka santos. Kataposang ang-ang mao ang botasyon sa mga Obispo sa tibuok kalibotan nga magtigom sa Vatican sa Roma.

Have something to report? Tell us in text, photos or videos.

Ug si Blessed Calungsod pinal nga hukman nga santos ning semanaha didto sa Vatican hinungdan sa dakong pagpangandam sa lokal nga simbahan uban sa pag-ampo alang sa katumanan sa damgo nga du­nay maila nga Bisaya nga santos.

Ang mga santos giilang modelo sa pagtuo ug e­hemplo sa pagpakabuhi nga Kristiyano bisan bugti pa niini ang hinuwaman nga kinabuhi.

Kon itande nato sa kagamhanan, sila ang mga bayani sa nasod nga giila sa ilang kaisog ug kalantip sa hunahuna alang sa nasudnong kaugalingnan ug kahiusahan ubos sa hustisya ug kaangayan.

Apan ang usa ka bayani, sama sa santos, kinahanglang masubay sa mga sinuwat ug mga saksi sa dagan sa estorya sa iyang pagkabana. Busa, way pagpataka. Gibase sa kasaligan nga kamatuoran ang pag-idolo sa usa ka bayani o santos.

Martir ang pag-alagad sa lumad nga Sugbuanon, Bles­sed Calungsod. Usa ka lay minister nga niuban sa paring Jesuit sa misyon sa Guam niadtong 1600s ug gipamatay. Ug bisan sa kataposang gutlo sa iyang kinabuhi, mas milig-on ang iyang pagtuo ni Ginuong Hesus.

Seguro dunay sama mas grabe pa nga kasinati­an kaniya apan wa mapatik sa kasaysayan o unsung heroes. Apan, kini ang kamtuoran -- dili tanan maila. Ug manghinaut na lang kita nga paborable ang botasyon alang kang San Pedro Calungsod.