Nadela: Bisperas na sa ‘Oplan I Love You”

Sunday, February 12, 2012

DI lang ang taga Land Trans­portation Franchising and Regulatory Board (LTFRB) ang molusad og ‘Oplan I Love You’ ugma.

Ang mga asawa nga dunay pagduda sa sensiridad sa ilang mga bana, lakip nga manakop ugmang adlawa ang adlaw sa kasingkasing. Di taxi driver nga manglubag sa ilang pasahero nga mosud sa mga motel ang ilang puntarya. Ang ilang Oplan mao ang ilang mga bana, nga sa ilang pagtuo giluiban sila tungod sa daghan kaayo nga rason.

Have something to report? Tell us in text, photos or videos.

Di na angay nga ikahibulong kining isyu sa pagka maluibon sa bana o asawa. Kung moadto ka sa korte dunay daghan didto nga mga kaso nga nag­lambigit ning maong isyu. Kung moadto ka sa barangay, nagtipun-og sab ang mga kaso nga gidumala karon sa Lupong Tagapayapa. Kung moadto ka og mga private detective office, daghan sa ilang tawo ang gisugo pagsunodsunod sa mga nalambigit sa maong isyu.

Kadtong way ikasarang pagdangop sa hukmanan aron mosang-at og kaso kutob nalang sa paghilak, magpangagut ang ngipon,  mangumo daw kasuntokon ug siga kaayo ang mata murag mokilaw og tawo. 

TEXT

Sukad nga naimbento ang pagpdangat og mensahi pinaagi sa text di na maihap ang  mga magtiayon nga nagkabuwag. Dunay uban wa tuod magbuwag, apan wa na magtinggganay. Kay sa text message nabisto ang kulakadidang ni mister o ni misis. Bisan kong giunsa pagtago ang illegal nga relasyon sa text kini nabisto.

Apan di tanan nga gikasuk-an ni misis o ni mister basi sa ilang nabasahan sa text sakto. Kay dunay mga mensahi nga gihatagan og malisya, gilain og sabot mao nga nagkagubot. Mao nga sa ka higanti ning maong teknolohiya, angayan siguro nga magdayalogo di lang ang mga magtiayon , apil na ang mga uyab, kay sayang kaayo ang inyong relasyon nga ma-delete lang tungod sa sayop nga pagtuo. Siguro ang uban diha mabinantayon kaayo karong adlawa sa mga mensahi nga mosud sa cellphone, kay basin matinuod ang inyong pagduda nga ang inyong palalab dunay laing ka date ugma.

KURYENTE

Diriyot diay masunog ang Cebu City Police Office (CCPO) headquarters diha sa dalan Gorordo Avenue. Ang hinungdan mao ang nagkagidlay nga linya sa kor­yente, way kalainan sa spaghetti.

Nakaatol ko sa memorandum of agreement signing sa niaging Biyernes tali sa CCPO ug Visayan Electric Company. Sila si VECO EVP ug COO Jaime Jose Aboitiz ug Sr/Supt.
Melvin Ramon Buenafe ang nagpimahanay aron hatagan og libreng pagpalambo sa electrical system ang maong buhatan. Nangutana ko kang Aboitiz kung di ba sab nila iapil ang ubang police station, nihatag sab siya og go signal niini.