Editoryal: Ning adlaw sa gugma

Monday, February 13, 2012

MATAM-IS nga selebrasyon ang pagasaw-an sa mga nagminahalay karong adlawa – ang pagsaulog sa Adlaw sa Gugma.

Mga dapit nga naghatag og timaan sa pa­nag­higugmaay maoy paborito karong bisitahan ug salo-salohan sa kadaghanan.

Have something to report? Tell us in text, photos or videos.

Hinatagay o binayloay sa mga pungpong sa mga bulak nga rosas, mga karmiletos, tsokolet ug uban pa maoy sagad buhaton sa matag usa.

Dunay mga pamilya nga bisan pa man sa kahigpit sa ilang oras ug panahon, apan ang panaghiusa, bisan sa makausa lang ka higayon, maoy ilang tinguhaon.

Mga restawran o imnanan napuno sa mga dayandayan aron pag-agni ni bisan kinsa nga gusto nilang maserbisyohan.

Ang kataas sa teknolohiya karon naghatag usab og igong kasayon, ilabi na niadtong mga naghigugmaay nga giuwang sa mga lagyong dapit apan sa gihapon sila makapadangat sa ilang mensahi ngadto sa matag usa. Pinaagi sa internet ug bisan sa cellfones lang dali nilang mapaabot ang mga matam-is nga pulong nga nagpadayag sa tagsatagsa ka gibating kahinam.

Di usab malikayan nga adunay magtagay sa lawasnong panginahanglan aron paghupay sa ilang kahinam. Sukad pa kaniadto, nabaniog na kaayo, nga ning ingon aning mga adlawa, mga kuwarto sa motel o hotel pulos akupado na. Di sila gusto nga sa ilang selebrasyon dunay makadisturbo.

Apan kining maong selebrasyon dili lang sa mga nag­higugmaay. Bisan gani kadtong mga suod nga higala o mga barkada ang maghiusa usab sa kasaulogan ning adlawa timaan nga sila nagminahalay usab sa u­sag-usa kay lagi kini man ang Adlaw sa Gugma.