Espinoza: Husto na, ayaw nag pakauwaw!

Monday, February 13, 2012

PAKA-UWAW! Pakamatyan ni Chief Justice Renato Corona ang iyang posisyon sa Korte Suprema ning nasud. Sus, unsa man intawon ang naa sa ulo ni Corona. Sa mubong pagkasulti iyang gipalabi ang kwarta kay sa iyang dungog.

“Kahit patayin ninyo ako, lalabanan ko kayo hanggang sa huling hi­ninga,” matod pa ni Corona atubangan sa iyang kunohay nga mga du­madapig. Iya pang gipa­kapinan og hilak-hilak nga way luha.

Have something to report? Tell us in text, photos or videos.

Klaro nga migasto si Corona alang sa PR. Dunay iyang mga posters nga gipapilit sa sulod sa mga Halls of Justice nga nag-awhag sa mga empleyado sa hudikatura nga mopaluyo kaniya. Ang pangutana kinsa ang misuporta kaniya?

Grabe diay kalami ug kadaghan ang kwarta sa trabaho ni Corona kay iya man pakamatyan. Migawas pa si Corona sa iyang pagka chief justice di unta maukay ang iyang daghang kwarta sa bangko.

Klaro na ang ebidensya nga wa ni Corona gideklarar sa iyang SALN ang iyang daghang salapi nga naa sa iyang bangko. Naglibog ko kon unsaon og depensa ni Corona sa iyang minilyon nga kwarta sa bangko nga di man malalis ang mga dokumento nga ebidensya.

Katungod ni Corona ang pakigbisog sa impeachment batok kaniya. Apan sa ebidensya nga gipakita sa prosekusyon sa impeachment nga daghan siyag kwarta ug kabtangan nga wa madeklarar sa iyang SALN wa pa gihapon siya makasabot?

Ingnon tang pung nga di siya makumbikto sa Senado (pero morag imposible), apan atubangan sa katawhan labina kadtong naminaw sa impeachment trial kumbiktado na si Corona sa iyang mga salaud.

Sa laing bahin, ang gipagawas nga temporary restraining order (TRO) sa Korte Suprema nga dili maablihan ang dollar account ni Corona nagpakita ug nagpasabot lang nga dunay tinaguan usab ang iyang mga kauban. Hadlok nga mahibaw-an ang ilang dollar account?

Ang Senado ngan nga impeachment court dili mapugngan sa Korte Suprema sa iyang pagabuhaton. Kay kon mahitabo kini way mahimo nga impeachment ug mogawas nga gawasnon na si Corona.

Ang Senado, ngan nga impeachment court, kinahanglan ipakita ang iyang katakus ug pagka-independente. Kinahanglan taposon ang impeachment ug mahamtangan si Corona kon sad-an ba o dili aron atong ipakita nga kita hinog na sa larangan sa pulitika.

****

FLYOVER. Napug­ngan tuod ang implementasyon sa flyover nga proyekto ni Kong. Cutie del Mar sa north district apan duna kini dakong epekto unya sa Mayo 2013 nga piliay.

Si Sec. Mar Roxas nga modagan pagka senador di suportahan sa BO-PK.

Ang BO-PK boss nga si Kong. Tomas Osmeña ug Del Mar dili mosuporta ni Mar Roxas ingon man sa mga kandidato sa Liberal Party tungod kay ang flyover gipugngan og implementar. Nga naa si Mayor Mike Rama sa LP, pakapin na lang na nga storya.

Halayo pa gani ang piliay sa presidente, ang grupo sa mga enhinyero ug contractors naa na sa kampo ni Bise Presidente Jejomar Binay. Si Binay nagpsabut na nga modagan pagka presidente sa Mayo 2016.

Sa ato pa, klaro na nga si Mar Roxas nagta­ki­lid na. Si Roxas ngan nga presidente sa LP mao nay giila nga modagan pagka presidente inigkahuman sa termino ni Presidente Noy Aquino unya.

Sa laing bahin, ang pagpugong sa implementasyon sa flyover projects ni Del Mar naapektohan ang mga kontraktor. Misupak ang pundok sa mga negosyante tungod kay ang flyover di permanente nga solusyon sa trapiko.

Matud pa ang flyover morag Band Aid nga solusyon sa problema sa trapiko. Sa kamubo sa mga dalan ug nagkaduol nga mga eskina mosamot kagubot ang trapiko tungod sa flyover.

Ang giingon nga elevated tracks maoy premanente nga so­lusyon sa trapiko.

(elespinoza53@yahoo.com)