Mongaya: Lubogon ang impeachment trial

Monday, February 13, 2012

USA ray basa nako niining kalaki sa Korte Suprema nga moisyo og temporary restraining order (TRO) aron di maablihan ang dollar account ni Chief Justice Renato Corona.

Moingon ang uban nga nagtinabangay ang mga kaalyado ni CJ Corona diha sa Korte Suprema aron di malili ug mabunggo ang kontrobersyal nga dollar account.

Have something to report? Tell us in text, photos or videos.

Dunay moingon nga gipatigbabaw karon sa Korte Suprema ang pagpanalipod sa usa ka paagi nga makatago ang mga kinawkaw sa mga kurap nga mga opisyal.

Duna say nagtuo nga sa maong pagbraso sa Korte Suprema aron mapanalipdan si Chief Corona, namilok ang mga senador-juror sa Senate Impeachment Court ug nagpaubos. Ug ang mga sabaan ug isog nga niingong mas taas ang Impeachment Court wa makaugpo.

Ang nahitabo sama lang sa usa ka bata nga nanghagad og bagay sa laing bata nga nagsigig ingon nga siya ang mas isog apan wa diay mosukol.

Apan di kana ang akong punto karon. Nagtuo ko, nga kining tanan tipik sa usa ka estratehiya nga lubugon ni Corona ang impeachment ug himuong si Presidente Noynoy Aquino ang isyu, ug di siya.

Sa sugod, gusto nilang ihigot og mga legal technicality ang impeachment pinaagi ni defense lead counsel Serafin Cuevas.

Apan wa mapugngi ni Cuevas ang pagpagawas sa mga ebidensya sama sa statement of assets, liabilities, and net worth (SALN), ang mga titulo sa mga condo ni Corona, ug ang mga peso accounts.

Di kaya sa mga po­wers ni Cuevas ang pag­lugpit sa mga ebidensya nga nagbunggo hinuon sa mga katigayunan sa Chief Justice ubos sa argumento nga igo lang niyang gipanalipdan ang mga katungod niini.

Tungod niini, nidangop karon si Corona ug ang iyang defense panel sa Korte Suprema nga siya ra ang Chief Justice ug ang mayorya maoy iyang mga tigsuporta.

Nihimo sab silag press conference nga ilang gikwestyon ang kredibilidad sa impeachment court ug si Corona dunay laing pamahayag nga siya inosente ug ang isyo mao kintahay ang Hacienda Luisita.

Klaro na kaayo nga tuyo ni Corona mao ang paglubog karon sa impeachment trial ug himuong isyo mao na si Presidente Aquino.

Sa akong pagtan-aw, estratehiya kini sa usa ka tawo nga sad-an ug gusto nilang mahunong ang impeachment trial.

Kinsa may motuo nga di kinawat ang mga katigayonan ni Chief Corona nga wa niya gitaho sa iyang SALN?

Klaro na man nga duna siyay mga condo nga wa gi-report sulod sa katuigan. Duna siyay mga condo nga wa niya gitaho pagtarong sa iyang SALN. Dihang naablihan ang iyang mga peso accounts sa banko, duna pa gyud siyay mga minilyon nga wa niya gitaho sa SALN.

Klaro nga wa siya mosumiter og SALN nga nakapasar sa gilagda sa balaod ug sa Konstitusyon. Ang katuyoan sa SALN mao ang pagsiguro nga di mangurakot ang usa ka opisyal.

Ug gikinahanglan nga matinud-anon ang mga impormasyon nga itaho sa maong dokumento.

Ang nakalisod kay ang labing dakong opisyal nga mohukom og mga kasong pangurakot mao may wa motuman sa maong kamanduan sa balaod ug Konstitusyon.

Tungod niini, tuyo na lang ni Corona nga lubugon ang tibuok proseso.

(politika2013.wordpress.com)