Nalzaro: ‘Sana dalawa ang puso ko’

Monday, February 13, 2012

KARONG adlawa mao ang adlaw sa kasing-kasing.  Espisyal karong adlawa alang niadtong mga tawo’ng nagkahinigugmaay. Greeting cards, chocolates, cakes, red roses ug kolor puwa ang modominar karong adlawa, Valentines Day. Diin man kini magsugod ug nganong gisaulog man kini? Ang Va­lentines Day gikuha gikan sa pangalan ni Valentine, usa ka obispo didto sa Roma niadtong pangagamhanan ni Roman Empire Claudius II. 

Gumikan kay uso pa man ang gubat niadto tali sa mga gingharian, mimando si Emperor Claudius 2 nga ang mga ulitawo dili makaminyo og gikinahanglan nga moserbisyo isip sundalo. Niadtong 270 A.D, si Obispo Valentine misupak sa maong kamanduan kay nalooy siya sa mga batan-on nga gihikawan nga makapadayag sa ilang gugma. Gihimo niyang kawsa ang pagtabang sa mga batan-on. Mipahigayon siya ug sekretong pagkasal. Hangtod nga nasakpan siya ni Emperor Claudius II ug gipapriso ug gipapatay. Human mamatay si Obispo Valentine nahimo siyang santos. Siya maoy patron saint sa mga lovers. Didto sa Roma, ilang gisaulog kining lovers day sa Pebrero 14, ug gisagop usab kini sa tibuok kalibutan.

Have something to report? Tell us in text, photos or videos.

GUGMA

Kon mahigugma ang usa ka tawo, alang kaniya kada adlaw Valentines Day. Kining gugma o relasyon wala kini perfect formula. Kada adlaw kining amumahon. Sama sa usa ka tanum, kada adlaw kining bisbisan o bubu-an aron kini molipang, mogamot og magpabiling lig-on. Kay kon dili, mawala lang usab kini dayon sa usa lamang ka pagpamilok.

Nahigugma na ba kamo? Kon akoy inyong pangu­tan-on, sa way lipod-lipod ako mo-angkon nga nahigugma na ako dili lamang kama-usa kon dili sa makadaghan nga higayon. Gani aduna may mga panahon nga nangandoy ako nga unta kon tugutan pa lang mamahiming duha ang akong kasing-kasing. Sama sa usa sa akong paboritong kanta nga “Sana Dalawa ang Puso Ko.”  Tsar.

KOMPLIKADO

Sama ning maong asoy: “Dili pa lang dugay, walay gubot ang akong kinabuhi. Adunay nagmahal ug nagpangga kanako o nagpangga usab ako. Apan sa dihang ako kang naila-ila, kalit lamang  nagbag-o ang dagan sa akong kinabuhi. Makapahibulong. Naglibog na ang akong kasing-kasing. Ug nakapangutana ako sa akong kaugalingon nganong usa ra may atong ka­singkasing? Dili man pod puwede nga akong buk-on ug pikason. Maayo unta ug duha ang akong kasing-kasing aron dili na unta ko maglibog nga mopili kon ikaw o siya ang akong higugma-on. Oh, gugma pagkalisod mong tukbilon. Happy Valentines Day sa tanan.(bobby.nalzaro@yahoo.com)