Lonzon: Recall election sa Danao

BISAN pa og nagtugot ang balaod sa usa ka recall election, sa mga piniling opisyal sa gobyerno nga midaog pinaagi sa eleksyon, ang tagaan unta og unang pagtagad mao ang pagserbisyo sa katawhan.

Kay basi sa reklamo nga akong nada­wat, ang recall election sa siyudad sa Da­nao, nagumikan sa away kay nag-ilog kuno sa bukog ang mga managsuong si Mayor Boy Durano ug Bise Mayor Ramonito Durano.

Kon tinuod ni mas maayo kaha og isalikway nalang ang recall ug paabuton ang nagkaduol nga Mayo 2013 diin ipahigayon ang eleksyon. Kay wa na man sila makaserbisyo ug tarong sama sa pagpatuman og mga proyekto.

Kamatuoran niini apektado man gani ang suweldo ug ang mga empleyado. Maayo pag maghiusa sila kay malipay pa ang katawhan nga nagpaabot sa ilang tinuoray nga pagpanerbisyo. Sama gud sa pag-segregate sa basura nga ilain ang malata ug di malata.

Ug si kinsay modaog sa pagka mayor sa tuig 2013 nga election atong sundan ang pagpadagan sa mayor sa siyudad sa Danao. Gani, basi sa ilang evaluation sa tanang nangaging mayor sa maong siyudad si Don Durano ang ilang gikonsiderar nga maayo ug limpyo ang pamaagi.

Samtang basi sa email nga akong nadawat, dag­han ang pabor sa mga batan-ong Durano nga maoy moduma sa renda sa pangagamhanan. Mitumaw ang pangan nila ni kanhi tourism secretary Ace Durano, Kongresista Red Durano,PB Jude Sybico nga maoy haom sa katungdanan.

SIYA NA BA ANG SUSPEK?

Gikonsiderar sa kapulisan nga nasulbad na ang kasong pag-ambush-patay ni Virginia Sesbreno, drayber ug sa katabang human nadakpan ang gun-for-hire nga si Tommy Tenchavez, dihang nakigpinusilay sa kapulisan.

Tungod niini, atong pakpakan ang kapulisan dungan sa panghinaot nga palig-unon pa unta ang mga ebidensya batok sa akusado aron diretso na og way sami inig abot sa piskaliya ug didto sa korte aron husayon ug hukman ang kaso.

Usahay man gud ang pagdalidali sa kapulisan sa pagdakop og suspek bisan sa kakuwang sa mga ebidensya aron lang masulbad ang kaso moresulta sa dili maa­yong dagan ug ang mahitabo way hustis­yang maangkon ang pamilya sa biktima.

Kini unta maoy maghatag kanila ug leksyon kay bisan pa og fall guy ang madakpan di man gihapon ta bilib. Mao gani dugay na ang atong paghangyo sa kapulisan nga di yak-an ang mga kaso nga ilang gihuptan.

Kay daghan na kaayo karong mga hired killer. Ug kining atong mga pulis nakaila man sab kun si kinsa kining mga tawhana kay ilhado man kini sa ilang lugar sama sa tawo nga nagnegosyo ug drugas kay imposibli man kun way nagpuyo nga pulis sa usa ka setio sa barangay nga di sila magkailhanay.

MIKE , TONY UG ALVIN

Morag wa mahulga ang Bando Osmena Pundok Kauswagan ( BOPK ) nga gipangoluhan ni south district Congressman Tomas Osmena, ang planong panag-alyansa nila ni Mayor Mike Rama sa dakbayan sa Sugbo og kanhi kongresista Tony Cuenco.

Apan para nako morag molig-on kay wa man ma­katilaw og pildi si Cuenco sa south hangtud nga gipulihan siya ni Tomas. Mao ni ang nindot nga kumbati nga paabuton sa katawhan kana kun di mausab ang hunahuna ni Cuenco.

Sa habig ni kanhi Cebu City Mayor Alvin Garcia, iyang giingon dihang ako siyang na-interview, nga dunay posiblidad nga magkauban sila ni Mike ug Tony apan magtigom pa una sila kauban sa ilang grupo sa Kugi Uswag Sugbo (Kusog) sa dili madugay.

Hinuon, wa maghisgot si Alvin ug posisyon alang sa uma­abot nga election. Apan kini sigurado gyud nga makapalig-on sa kontra sa BOPK ang puwersa ni Mike, Tony ug Alvin.

(efren_lonzon@yahoo.com, Globe 09156938444, Sun 09327380888)