Lonzon: Sunog dinhi, sunog didto

MAKALILISANG ang mga nahitabong sunog din­­hi sa Sugbo. Sa akong tan-aw, murag naghilak ang adlaw kun way mahitabong sunog sugod niadtong miaging duha ka semana dihang gibuksan ang Fire Prevention Month ning Marso.

Ang labing paet ug makasubo sa balita kay ang sunog nga nahitabo sa Barangay Pardo, siyudad sa Sugbo, niadtong Sabado, namatyan gyud og tulo ka mga tawo.

Ug sa pagsud sa unang adlawng Lunes sa ika tulong semana sa buwan miigo sab dayon
ang sunog sa siyudad sa Lapu-Lapu nga nipatay sa inahan ug anak.

Sa maong panghitabo nagkadako ang atong kabalaka nga ang sunog nga niigo dinhi ug niigo didto nga mikalas na ug daghang kinabuhi mahitabo sa atong kaugalingong
panimalay kon di magmatngon ang matag usa kanato.

RECALL election

Bisan og duna nay hukom ang Comelec Manila nga wala nay mahitabong recall election sa siyudad sa Danao alang sa posisyon sa pagka mayor. Wa mawad-i og paglaom si Konsehal John Cane, ang abogado ni Vice Mayor Ramonito Durano, nga kini mapadayon ug paburan ang ilang petisyon.

Ang hukom ra ba sa Comelec nahatukma sa akong unang lindog sa mi­aging mga semana, “Wa kinahanglana ang recall election sa siyudad sa Danao.”

Wa ko mo­i­ngon nga akoy gipaminaw sa Comelec mao nga usa ang maong siyudad nga wala pabori nga mapahigayon ang eleksyon.

Gawas pa wa koy gilabanan tali nila ni Ramonito ug Boy Durano, nga maoy mayor sa maong dakbayan sa ilang away kay wa man kini sila makaila kanako.

Ang ako lang anugon kaayo ang panahon kun magsigi kitag hisgot ug recall ug unya nagsiga ang mata sa katawhan sa Danao, kay nahikawan sa tinuoray nga panerbisyo.

Ato na lang kaha nga paabuton ang 2013, total sa sunod tuig naman ang election. Tagaan lang unta og kahigayonan ni Boss Nito ang lider sa Bakud party si Ace Durano, kanhi tourism secretary pagka mayor ug Board Member Jude Sybico, pagka Bise Ma­yor kay dag­han pa ang ma­lipay.

Ila sab nga gisugyot ang anak ni oposisyon lider ug kanhi mayor Don Durano nga si Mon­ching haom a­­­lang sa maong posisyon sa pagka mayor. Kausaban man gud ug bag-ong dagway ang gusto sa katawhan sa Danao.

JONAS UG TEDDY

Kinsa namay mobarog ug mokontra ni Mayor Jonas Cortes sa siyudad sa Mandaue alang sa posisyon sa pagka mayor?

Nakapangutana ko niini kay migawas man gud ang balita sa panag alyansa sa pulitika sa pamilyang Ouano ug Cortes.

Posible ba nga ang pa­milyang Quisumbing? Apan di sab tingale mahitabo kay maayo naman ang kahimtang ni Kongresista Quisumbing sa ikaunom nga distrito.

Gani, si Inday Neri Ruiz, usa sa mga lig-ong haligi sa pulitika kaniadto sa Mandaue ug nahimong kongresista sud sa taas nga panahon naa naman sab ni Cortes.

Kun mao ni, hayahay pa unya sa pulis ang kaugmaon ni Jonas. Apan dunay mii­ngon nga mas nindot kun si Konsehal Lollipop Ouano ang himuong runningmate ni Cortes alang sa 2013.

COMPOSTELA

Sud sa pila ka tuig nga way naglingkod nga mayor ang lungsod sa Compostela, Sugbo, gawas sa OIC nga nagikan sa Department of Interior and Local Government (DILG) karon milingkod na ang tinuoray nga mananaog nga si Mayor Joel Quino, kauban ang bise mayor ug mga konsehal.

Karon ang angayang unahon sa mayor mao ang paghatag gilayon ug serbisyo ngadto sa katawhan ug ipauwahi ang paggukod sa iyang gipildi. Nakadawat man gud kog report nga nagsige na sila ug pangukay sa sayop sa kanhi namonoan. efren_lonzon@yahoo.com/ 09­32­7380888/0915-6938444