Bañoc: Kinabuhi mas bililhon

DAKONG kalamboan sa dakbayan sa Sugbo ang pagtukod sa Horizons 101 diin gilantaw nga labing taas unya nga condomium building gawas sa Metro Manila.

Dako nakong kahinangop alang sa Taft Property Ventures Development Corp. (TPVDC) nga naghago aron matukod ang horizons 101. Atong pasalamatan ang mga negosyanteng Gaisano nga mobutang ning mao nga edispiyo kay sa ingon nga paagi molambo ang ekonomiya sa Sugbo.

Duna lang hinuoy problema nga mao ang pagkahagsa sa ilang paril niadtong Abril 10. Ang
mao nga paril ang nagsilbing retaining wall sa edipisyo.

Naukay na hinuon sa nagkadaiyang mga ahensya sa gobiyerno ang pipila ka mga kakuwangan sa TPVDC sa pagtukod sa edipisyo. Ang Environmental Management Bureau (EMB 7)
nakadiskobre ning mga mosunod nga kalapasan sa TPVDC sa ilang Environmental Compliance Certificate (ECC):

Una, pakyas ang TPVDC sa pagsumiter ug approved work ug financial program ingon man ang Grantt chart; ikaduha, mao ang kapakyas sa pagkuha ug permiso sa ilang stand-by generator; ikatulo mao ang kapakyas sa pagsumiter sa ilang semi-annual reports sa pagtukod sa proyekto.

Samtang ang City Traffic Operations Management (CITOM) nakadiskobre nga wala makasumiter sa ilang traffic plan ang TPVDC sa pagtukod sa ikaduha nga tower.

Ang Senior Geologist sa EMB 7 nga si Elena Lupo duna nay nahiunang report mga napulo ka buwan na ang nakalabay ngadto sa Mines and Geosciences Bureau (MGB) nga nagpahimangno nga peligrong dunay cave-in nga mahitabo sa gitukuran sa Horizons 101
gumikan sa kahumok sa yuta.

Si Alvin Santillana, Executive Director sa Cebu City Disaster Risk Reduction Management Council (CCDRRMC) nahingawa usab kay dunay sapa ang apil sa gitukuran sa edipisyo.

Si Dr. Salvador Reyes, ang eksperto sa structural engineering sa University of the Philippines (UP) sa Diliman miingon nga humok ang yuta nga gitukuran sa Horizons 101.

Kon duna man kahay problema sa tukuran nga yuta, nganong nahatagan man sa EMB 7 ang TPVDC sa pagtukod sa Horizons 101?

Sa gikaingon ko na, dakong kalamboan sa dakbayan sa Sugbo ang pagtukod sa Horizons 101. Apan sa nakit-an karong mga problema, labing maayo nga matun-an ug tarong sa atong mga ahensya kon angay ba o dili nga ipadayon ug tukod ang proyekto.

Mas malipay ko nga mahuman og tukod ang Horizons 101 basta dunay kasiguruan nga kini luwas sa atong kinabuhi.

Bililhon kaayo ang mao nga propriyedad apan mas bililhon ang kinabuhi nga angayng panalipdan batok sa umaabot nga disgrasya.