Espinoza: Di makonbikto si Corona?

USBAW. Ang mga pribadong eskuwelahan aron makausbaw sa sweldo sa ilang mga empleyado kinahanglan mopasaka sa mga balayranan sama sa tuition ug uban pa.

Matod pa sa Ched (Commission on Higher Education), 12 ka mga kolehiyo ug unibersidad sa rehiyon 7 ang mopasaka sa tuition karon ting-abli human giaprobahan ang ilang aplikasyon nga mopasaka sa tuition.

Wa pa hinuon gibutyag sa Ched kinsa ning mga kolehiyo ug unibersidad nga mopasaka sa tuition. Kon modayon ang pagpausbaw sa tuition, morag mominos ang enrolment karon nga semestreha.

Ang akong pangagpas nga­nong wa pa gibutyag sa Ched-7 ang mga pribadong eskuwelahan nga mopausbaw sa ilang tui­tion human naaprobahan ang ilang petisyon tungod kay nahadlok sila nga way mo-enrol unya .

Maingon nato nga maayo ang pagpataas sa tuition alang sa mga magtutudlo ug mga obrador sa mga pribadong eskuwelahan apan dugang hubag usab kini sa bulsa sa mga ginikanan sa mga estudyante.

Dili maayo ang gibuhat sa Ched-7 sa di pagpagawas sa mga ngalan sa mga kolehiyo ug unibersidad nga mopasaka sa balayranan sa tuition. Kinahanglan makahibawo karon ang publiko samtang wa pa magsugod ang enrolment.

Ang angay nga buhaton sa mga ginikanan nga igo lang og kita adto paeskuwelahon ang ilang mga anak sa mga kolehiyo o unibersidad nga iya sa gobyerno sama sa Cebu Normal University (CNU) ug uban pa kay di mopasaka sa tuition.

****

DUDA. Dunay mga nagkalain-lain nga panahom ang pipila ka negosyante nga akong kaila ug nakahinabi kabahin sa ilang pulso sa nagpadayon nga impeachment trial ni CJ Renato Corona sa senado.

Ang usa nagtuo nga makonbikto si Corona tungod kay wa siya modeklarar sa tinuod sa iyang SALN sa tanan niyang kabtangan, propridades ug dolyares. Pangutana pa niya, diin man si Corona og US$100,000?

Ang kadaghanan sa akong nakahinabi nagtuo nga makonbikto gyud si Corona. Apan ang usa miingon nga wa siya magduda nga dili makonbikto si Corona tungod sa naghingabot nga piliay sa Mayo 2013.

Matod pa sa akong amigo, si Corona bisag dili miyembro sa Iglesia ni Kristo (INK), gisuportahan siya sa INK labina kay ang nag-una niyang abogado sa depensa miyembro man sa INK.

Ang mga pulitiko nagkinahanglan sa boto sa INK nga maoy labing dakong grupo nga solido mohatag og supor­ta sa ilang kandidato. Kini atong nakita sa miaging piliay diin midaug si Presidente Noy Aquino batok ni Erap tungod sa suporta sa INK.

Ang lain usab nakong amigo misalmot pag-ingon, kinsa bay dili kurakot diha sa kagamhanan labina sa Kongreso? Ang usa nga dumadapig ni PNoy miingon nga ang Presidente ra maoy limpyo.

Apan ang usa niingon nga si CJ Corona gigukod ni PNoy ug sa iyang mga kaanib sa camara baja tungod sa desisyon sa Korte Suprema nga ihatag ang bahin sa mga mag-uuma sa Hacienda Luisita sa baratong presyo.

Tungod sa naghingabot nga piliay sa Mayo 2013, kinahanglan mahuman ang impeachment trial ni CJ Corona sa di pa matapos ning 2012. Kay kon moabot pa ni sa sunod tuig dako ang posibilidad nga mausab ang dagan sa hangin sa Senado.

Gani dunay mga hungihong ug pagtuo nga mao ni katuyoan sa depensa nga langayon ang presentasyon sa ilang ebidensya aron moabot sa panahon sa piliay.

Dunay dakong posibilidad nga di makonbikto si CJ Corona tungod sa klase sa atong pamulitika nga ang naggunit sa renda sa gobyerno mga adunahan lang. Matod pa sa komedya, “onli en da Pilipins”.

(elespinoza53@yahoo.com)