Editoryal: Tinud-anay nga hustisya

WA NAY kinabuhi nga naabtan ni Carcar City Mayor Nicepuro Apura ang iyang kamanghurang anak nga gipusil samtang nagtan-aw og concert diha sa Sitio Upper Tubod, barangay Valladolid niadtong Dominggo sa ala una ang takna sa kadlawon.

Si Carl Vinson Apura, 25, gipusil sa iyang tampihak samtang nagsayaw ug sa samang higayon nagtan-aw sa konsiyerto dili ra usab halayo sa ilang panimalay.

Wa pay suspek nga natumbok apan ang labing duol ug usa sa mga gidudahan sa mga tinugyanan sa balaod mao ang may kalabutan sa fraternity.

Bisan pa man sa kadaghan sa mga tawo atol sa maong hitabo wa pay bisan usa nga nangahas pagsaksi aron pagtumbok sa tinud-anay nga mamumuno.

Hangtod ning pagsulat, pulos lang mga hugon-hugon ug mga pangagpas ang mga teyoriya aron sa pagpahaom sa motibo sa maong linuog nga kamatayon.

Siguro mipatugbabaw ang kahadlok sa mga nakakita sa mipusil-patay sa batan-ong Vinson nga ti­ngali og maapil unya sila sa kasamok.

Sama sa iyang maguwang nga si Anthony John, si Carl Vinson miyembro usab sa Alpha Kappa Rho (Akrho) fraternity.

Si Provincial Director Sr. Superintendent Patrocinio Comendador mimando sa Provincial Intelligence Branch (PIB) ug sa Provincial Investigation and Detective Management Branch (PIDMB) nga moayuda sa imbestigasyon. Matod ni Comendador nga aduna na silay lead sa suspek.

Hinaot unta nga mahatagan kini sa dinaliang kasulbaran nga ang tinud-anay gyud nga makasasala maoy mataral sa hukmanan.

Lisod na og di molutaw ang tinud-anay nga hustisya kay tingali baya og mao na hinuon kini makagusbat og samot sa kahusay ug kalinaw sa maong dakbayan.