Nalzaro: Luoy ang mga magbubuhis

BISAN pa man sa pag-insister nga modagan gyud siya pagkasenador, apan daghan gihapon ang dili motuo ni Governor Gwen Garcia. Ug usa nako. Una, kon desidido gyud siyang modagan, nganong mibalhin man siya sa iyang voter’s registration gikan sa Dumanjug nga sakop sa segundo distrito ngadto sa Barili nga sakop sa tersiro distrito? Dili na siya angayan pang mobalhin kay bisan asang suok sa Pilipinas siya magparehistro, kwalipikado man gihapon siyang modagan.

Daghan ang natuo nga ang iyang pagparehistro sa Barili, maoy iyang fallback kay kon sa iyang tan-aw dili mosaka ang iyang ratings nga maapil siya sa winning circle, magpapili na lang siya sa pagka-kongresista sa tersero distrito. Dili baya lalim nang iyang ambisyon. Sus, dili lang ko manganti pero layo gyud kaayo ang posibilidad nga modaog ang usa ka probinsiyano sa pagkasenador gawas kon nagdala ka sa popular nga apelyido o ba kaha nahimong senador na ang ilang mga amahan sama nila ni Koko Pimentel, TJ Guingona ug Serge Osmeña.

DAGHANG POPULAR

Dili sa pagbubo og bugnaw nga tubig aning ambisyon ni Gwen. Pero layo ang kahigayonan nga modaog na siya. Unom na daan nang mga re-electionists nga sila ni Loren Legarda, Gringo Honasan, Allan Peter Cayetano, Koko Pimentel, .Chiz Escudero ug Antonio Trillanes. Kon naa may mahagbong posible usa lang nila. Unya mobalik man si Richard Gordon. Naa pa sila si Jack Enrile, JB Ejercito ug Sonny Angara nga nakasandig na daan sa popularity sa ilang mga amahan. Naa pa sila Migs Zubiri, Justice Sec. Leila De Lima, Joel Villanueva, Risa Hontiveros Barequel,  Mitos Magsaysay ug Alma Moreno. Tan-aw nakong Gwen morag naa sa ika-kuwarenta.

WARI-WARI

Aw, okey man nang mangambisyon ta ba. Sama sa damgo wala bitaw nay bayad. Mao pod kana ang ambisyon ni Gwen kay nagtuo siyang sikat na siya. Apan ang nakaporke lang kay sa iyang ambisyon, iya mang gamiton ang kuwarta sa mga magbubuhis aron sa pagkab-ot niini. Nagsugod na siya sa pagsuroy-suroy sa tibuok Pilipinas ginamit ang kuwarta sa mga magbubuhis. Maka-angayon og tarung ba kana? Niadtong miaging adlaw, didto siya sa Pampanga kay mitambong sa usa ka kalihukan. Wala ra ba siya imbitaha apan mikuyog lang ni kanhi senador Migs Zubiri nga magpapili pag-usab.

Unya kanang iyang nga sisterhood sa ubang mga probinsiya. Pangdad-on ra ba ang ubang mga sakop sa Hunta Probinsiyal. Iyang girason nga sa iyang pagsuroy-suroy nagpromote siya sa lalawigan sa Sugbo. Iyang gi-promote ang Sugbo o ang iyang kaugalingon?

Kon mao kini ang kanunay nga himuon ni Gwen daw iya lang gilingla o gitikasan ang mga Sugbo-anon. Agwanta intawon og bayad og buhis apan giwari-wari lang ni Gwen aron pagbusog sa iyang kaugalingong kapritso. Maayo pay mopahuway siya.

(bobby.nalzaro@yahoo.com)Sent from my iPad