Editoryal: Isyu sa pletihan

GIBALIK ang pletihan sa PUJs sa Cental Visayas ngadto sa P7.50 sugod kagahapon.

Ang Land Transportation Franchising and Regulatory Board (LTFRB) nilibkas usab sa provisionary fare nga P8.00.

Ang provisionary fare gipatuman human sa sunod­sunod nga umento sa presyo sa mga produkto sa petrolyo sa ulahing bahin sa miaging tuig.

Samtang, ang LTFRB nisalikway sa petisyon sa kahugpongan sa mga drayber sa Sugbo sa paghimo sa plitehan nga P8.

Bug-at nga gibasihan sa LTFRB sa pagbalik sa P7.50 nga pletihan mao ang sunodsunod nga pag-us-os sa presyo sa deisel nga niabot sa P44 matag litro gikan sa dili mominos P46.

Apan, wala ba makakita ang LTFRB kon kapila nisaka ang presyo sa lana una gipatuman ang provisionary fare?

Dili kini makatugbang sa ulahing pag-us-os diin wala usay kasegurohan, tungod sa deregulation sa industriya sa lana sa nasod — pabor sa mga kompaniya sa lana nga daling makapaumento sa ilang presyo sa wala matinong panahon, “depende lang.”

Ang plitehan dakong isyu alang sa mga drayber kay kini ang dugokan sa ilang pagpanginabuhi sa adlaw-adlaw sa kadalanan—taliwala sa kaabog, kainit sa adlaw o uwan ilang giantos.

Makatarunganon ba ang pagpabalik sa pletihan sa P7.50? Tataw nga dakong dili ang tubag sa sektor sa transportasyon.

Ang pres­yo sa lana kabahin lang sa ilang operasyon. Laing dakong galastohan mao ang pagmintinar sa sakyanan, lakip sa pagkaon. Nibarato ba kini?

Klarong wala kini gikonsiderar sa LTFRB.