Durano: Ang sukli sa bakak

KUSGANONG gisupak ni Presidente Benigno Aquino III ang plano sa banay nga Arroyo sa pagpangayo og pagtugot sa Korte nga makabiyahe gawas sa nasud si Kongresista Gloria Macapagal Arroyo aron makapatambal sa mas abante nga teknolohiya sa medisina sa mga langyawng mga tambalanan kay migrabe na, matod pa, ang iyang gihambin nga balatian nga parathyroidism.

Ang hinungdan niini mao ang napamatud-an nang bakak kaniadto ni GMA nga diriyot pa nakalahos gyud sa pag-eskapo human gihatagan og dakong partidas sa Korte Suprema pinaagi sa ilang gipakanaug nga TRO (temporary restraining order).

Kining maong kahingawa sa Pangulong nasud ang giduyugan usab mismo ni Commission on Elections Chairman Sixto Brilliantes nga dikrekta usab nga mipadayag og pagbabag sa maong foreign medical treatment sa akusadong kanhi Presidente. Kay maoy ilang pagtuo nga klaro ug sihag kaayo ang intensyun niini nga mangita gyud og kahigayunan nga maka-ipsot sa iyang mga salaud nga nabuhat.

Aron mao na lama’y iyang pagabuhaton ang pagpuyo og haruhay nga kinabuhi sa gawas sa nasud mientras nagpaabot sa panahon nga matapos ang termino ni Noynoy Aquino ug ang makabanos sa paglingkod sa Malakanyang mao na unya ang ilang mga alyados ug mga alipores.

Apan si kanhi First Gentleman Jose Miguel Arroyo mitiyabaw ning maong gipakitang pagka-walay balatian sa kasamtangang administrasyon sa kahimtang sa iyang asawa. Kay niya pa, nga dili nila minugna-mugna ang medical condition ni GMA kay ang nakitang pagrabe sa iyang parathyroidism iya man nga medical diagnosis sa mga doctor sa Makati Medical Center.

Kon dili mahatagan sa dinalian nga pagtambal, ang maong sakit nga hypothyroidism ang magmugna og daghang mga kumplikasyon tungod kay sa kapakyas sa pagtuhop sa calcium sa lawas. Posible man nga mosangpot kini ngadto sa tetany nga makababag sa airways kun agianan sa oxygen sa liog.

Samtang ang kasagaran sa katawhan ang manghimaraut ug mosingit nga mirisi. Apan imbis atong suklian pagdiretso ang bakak sa buhat nga dili mayo, nganong modiretso man dayon kita sa pagkundinar sa tawo nga wala pa gani nato mapamati ang opinyon sa mga medical expert?

Sayun ug dali ra unta ang pagkuha ning mga ispesyalista apan wa gyud buhata kay mao gyu’y tuyo ang dinalian nga pagpa-ukyab. Nga wala gi-aninaw’ng daan sa unahan ang mogawas nga resulta sa ilang lunlon hinambog nga desisyun.