Editoryal: Kakuyaw sa Carcar

MAAYO kay nadakpan na ang suspek sa pagpatay kang Carl Vinson Apura, anak ni Carcar City Mayor Nice Apura.

Apan ang pagpatay sa anak sa mayor maoy nagsalamin sa di maayong kahimtang sa kahusay ug kalinaw sa mao nga dakbayan.

Pila na ka mga kaso sa pagpamusil ang nahitabo sa mao nga dakbayan bisan dihang usa pa
kini ka lungsod ug di pa mayor si Apura.

Unsaon man gud, kon tinuod ang mga hungihong, dunay impluwensyadong mga tawo ug pulitiko ang naghupot og armadong mga grupo nga nagsilbeng mga private army.

Kay impluwensyado ug gamhanan ang naghupot ning mao nga armadong mga grupo, di sila mapuhag ug mabungkag kay duna man silay mga protector.

Gawas sa armadong mga grupo, giingong nag-operate ug nakagamot na og maayo ang drugas sa mao nga dakbayan. Nagdugang kini sa hulga sa kahusay ug kalinaw sa mao nga dapit.

Hangtod nga way tinud-anay nga kampanya batok sa armadong mga grupo sa mao nga dakbayan nga ilusad ang mga city official, pulis man o local go­vernment unit, ang kamatayon ni Carl Vinson ug ang pagkasikop sa suspek di maoy magtuldok sa bayolenteng mga hitabo sa Carcar City.

Kon maghari ang kahadlok, duna kahay ganahan nga mobubo og puhunan sa mao nga dakbayan nga maghikaw na hinuon sa mas paspas ug dakong kalamboan?