Durano: Boykot kontra pikot

HUMAN mipagawas og travel advisory ang People’s Republic of China ngadto sa ilang mga konstituwente nga dili na pasuroyon pa dinhi sa atong nasud sa Pilipinas ug gibabagan pang makasud ang mga fruit exports gikan sa Mindanao sa ilang mga major cities tungod sa nagpadayong stand-off sa Scarborough shoal, dali nga gisubli ni Albay Vice Governor Joey Salceda ang iyang kampanya nga iya nga nasugdan niadto pang milabayng tuig nga nag-awhag sa tanang mga Pilipino lukop nasod sa pagboykot sa tanang mga produkto nga minugna sa mga pikot.

Niya pa, nga dili kita angay mahadlok ning maong istratihiya kay daan namang nakapabor ang mga Intsik sa ilang trade relations sa atong nasod sa Pilipinas.

Niadto lang tuig 2010, ang atong natala sa Bureau of Customs nga gi-import gikan sa China mokabat ngadto sa siete bilyunes dolyares ang kantidad samtang sais bilyunes dolyares lang ang atong exports. Kon sumadahon, ang atong trade deficit kun alkanse ang mo-abot ngadto sa 900 milyunes dolyares sa mao lamang nga tuig.

Apan sa mismong deklarasyon sa General Administration of Customs sa China, sila ang mapasegarbuhong mideklarar nga mokabat na ngadto sa 32.25 bilyunes dolyares ang ilang nahipos tungod sa ilang ekonomikanhong pakigrelasyon kanato.

Dinhi dili kalikayan ang pagtumaw sa 14 bilyunes dolyares nga average sa mga smuggled Chinese goods nga ilang gipabaha sa atong mga konsumidor matag tuig.

Unya sa aspeto sa direct investments, itlog kun zero gyud ang atong nasud sa pagdawat og mga negusyo gikan sa People’s Republic of China. Pero ang mga higanteng mga negusyanteng Filipino-Chinese ang nakahatod na og dul-an sa sa’is bilyunes dolyares na sa nasud nga gigikanan sa ilang kaliwatan.

Samtang daghan ang nabalaka nga mosamot unya sa kapungot ang mga pikot kon mobawos kitang mga Pinoy sa paghimo ug pagboykot sa ilang mga produkto. Apan unsa may atong angayan nga kahadlukan nga dili susama sa ilang binuhatan nga babagan gyud ang atong mga produkto nga makasulod sa ilang pantalan. Ang ilang mga baligya ang mahimo ra mang pasudlon apan dili paliton, unya palangawan na lang hangtud nga malata o kitkiton sa taya.

Bisan tuod og dili makamugna og dako nga pagkibra ang maong lakang natong mga Pinoy batok sa ikaduhang pinakadako nga ekonomiya sa kalibutan.

Apan ang importante nga atong ikapakita nga ang mga gagmayng mga ekonomiya susama sa atoa ang nakahimo usab diay sa pag-amot ug pagtampo sa kaharuhay sa mga higante.