Editoryal: Paghukom ni Corona

MGA kongresista nga namirma sa Articles of Impeachment batok ni Chief Justice Renato Corona hugtanong nagtuo nga ang testimonya ni Ombudsman Conchita Carpio-Morales maoy mahimong liko-anan sa pagkonbikto ni Corona tungod kay kini nagmatuod nga iyang gibudhian ang pagsalig sa katawhan ngadto kaniya, butang nga dakong supak sa konstitusyon sa nasod.

Ang gitumbok sa 188 ka mga kongresista mao ang pagbisto ni Ombudsman Morales sa 82 ka dollar account ni Corona nga gituohang moabot og 12 milyones dolyares.

Gihikyaran ni Morales og saktong dokumento ang mga senator-judges sa mga nahisgutang dollar account ni Corona ug sa samang higayon nakapakaging sa mga abogado sa depensa. Wa nila damha nga ang pagtindog ni Morales atubangan sa impeachment court mahimo diayng dakong hudlat sa ilang pagdepensa.

Bisan pa man sa pagbali-bali og pangutana sa mga senator-judges, consistent kaayong mitubag si Morales.

Si retired justice associate Serafin Cuevas, ang nangulo sa depensa, miangkon nga ang akusasyon nga si Corona adunay 82 ka dollar account maoy dakong isyu nga ilang tubagonon.

Tinuod nga ning higayona medyo nidap-ig man ang bintaha ngadto sa habig sa prosecution, apan di pa gihapon masiguro nga si Corona makonbikto.

Kini tungod kay kon ang regular court makakonbikto base sa mga gipresentar nga mga dokumento, ang impeachment court modesider pinaagi sa pagbuto sa mga senador.

Ug ning sitwasyona, hayag ang posibilidad nga dunay mga senador nga mohatag og gibug-aton sa ilang kolor sa pulitika kay sa mga dokumento nga ilang nakita na.

Gawas kon ilang ipatigbabaw ang konsensiya.