Nadela: Lantugi sa isyung Corona

KARON pa lang daghan na ang nangagpas nga si Chief Justice Renato Corona posibling di mahinayon sa pag-atubang sa impeachment court sunod semana. Ang ilang mga rason nagkadaiya. Dunay moingon nga basin og mangita og katarungan si CJ Corona aron makalihay sa mga pangutana sa mga senator-judges.

Ang uban nangagpas nga kutob sa mahimo di gyud mosugot si Corona nga labhan didto sa Senado ug bukiki-on ang mga isyu nga may labot sa iyang katigayonan.

Hinuon, daghan sab ang nisalig nga tumanon ni Corona ang gikasabutan tali sa iyang mga abogado ug sa impeachment court.

Sa ato pa, sa unang higayon sa kasaysayan sa atong nasod, usa ka dakong tawo, pangulo sa Korte Suprema, molingkod ug manubag sa mga pangutana sa usa ka impeachment trial nga gisud-ong ug gisaksihan sa nagkadaiyang suok sa kalibutan. Matubag ba ni Corona ang mga pangutana?

Nganong dili, nga maayong laki man sab ni siya nga abogado. Pero ang laing pangutana mao, makonbenser ba niya ang korte ug ang katawhan nga siya inosente sa mga pasangil sa prosekusyon? Kamong way lingaw karong Martes, pakiglambigit sa nag-unang isyu karon sa atong nasod.

OSMEÑA

Nakadawat ko og imbitasyon labot sa pormal nga pagpahibalo ni Junjun Osmeña sa iyang tinguha nga magpapili sa pagka kongresista sa Cebu City south district. Wa ko katunga tungod sa assignment sa field nga dugay sab kayo nga nahuman.

Apan nasundan nako ang maong kalambo-an pinaagi sa mga reporter nga nag cover sa maong kalihukan niadtong Martes. Sa pagka tinuod lang dugay na ko nga nagpaabot nga si Junjun makahukom gyud pagsud sa kalibutan sa politika.

Mao nga wa na ko mahibung sa iyang nga gihimo. Sa akong pagtuo, Ngay, wa gyud ka masayop sa imong desisyon.

Ug nagtuo sab ko nga sa mga nakaila nimo, di sila magmakuli pagsuporta, ilabi na sa imong mga higala. Sa ato pa daghan ang managan sa Cebu City south district sa pagtumaw sa ngalan ni Junjun.

Sa pagka karon, daghan pa ni sila, apan hibaw-i nga sa pulitika way imposible. Ang kontra o di manok karong tuiga posibling kaalyado na sunod tuig. Ang di masud sa partido karon posibling di lang gihapon sa pagsugod sa kampanya o mas labaw pa hinuon ang iyang maabtan.

Parehas ra sab na sa giingon nga ang pildihonon sa pagtuo sa uban mao na hinuoy kusog kaayo panahon sa kampanya.

Sa ato pa kining tanan nga panghitabo karon kon eleksyon ang hisgutan di maayong butangan og period, kay way maayong laki nga mananag-an kon pulitika na ang hisgutan.