Diola: Dila

Fr. Carmelo O. Diola, SSL
Mao diay

BINASI sa Buhat 1:1-11; Salmo 47; Efeso 4:1-13; ug Marcos 16:15-20.

“Unya, human makigsulti ang Ginoong Jesus, gibayaw Siya ngadto sa langit ug milingkod sa tuo sa Dios. Ug nanglakaw sila ug nagsangyaw sa tanang dapit, samtang ang Ginoo naglihok uban kanila ug nagmatuod sa pulong pinaagi sa mga timaan nga nagauban niini.”

Padayon ang Impeachment Trial ni Chief Justice Corona. Gitawag na nga sak­­si si Ombudsman Conchita Carpio Morales nga mi­­hatag og taho mahitungod sa mga dollar accounts kuno ni Corona. Gitabangan kini siya ni Commissio­ner Heidi Mendoza sa COA.

Sa akong nabasahan sa mga pamantalaan, mo­rag miigking si Atty Serafin Cuevas sa kalmante ug maayong tubag ni Morales. May nakaingon pa gani nga daw nakalitan siya sa gibutyag sa Ombudsman. Gani gipaagi na lamang ni Senador Miriam Santiago og argomento nga dili argo­mento: “Nakiglalis ka sa usa ka senador-huwes.” Segun pa ni Santo Tomas de Aquino: “Ang argomento binasi sa awtoridad mao ang labing huyang nga argomento.”

Naghulat ang tibuok Pi­­­lipinas nga magpakita si Corona sa Impeachment Court aron paminawon pod siya. Angay ug ma­ta­rong lamang.

Gihimo ang dila sa tawo aron paglitok sa kamatuoran ug pagsangyaw sa Maayong Balita.

Mao kini ang tumong sa dila. Kon dili kini masunod adunay dakong simang. Tungod kay wala kini nato sunda mao nga daghan ang kalandrakas sa atong kinabuhi ug kalibutan.

Mao tingali kini nga diha sa ebanghelyo nato gihisgotan nga usa sa mga timailhan nga nagauban si Kristo sa iyang mga sumusunod mao ang “gift of tongues” kun mga dili-masabot-nga-pinulungan. Makapangutana ta – ngano man nga giila kini nga timailhan?

Sa akong tan-aw tungod man god kon gamiton ang dila sa pagsulti sa kamatuoran ug pagsangyaw sa Maayong Balita, timailhan kini nga nagmadaugon ang kabubut-on sa Dios ug gipuy-an na ang Gingharian sa Diyos.

Ang dila man god mahimong simbolo sa pagdumala kanato sa kangitngit o sa kahayag. Gani
diha sa bibliya makapila hisgoti ang dili isip usa ka sakop sa lawas sa tawo nga lisod kontrolahon. Nangdayeg kini sa Dios apan mao sad kini ang manghimaraot sa isigkatawo.

Mao tingali nga ang dato nga miabot sa impiyerno nangayo og pakitabang kang Abraham nga ipadala si Lazaro aron mapiskan man lamang og tubig ang iyang dila. Unsaon man god nga kadtong buhi pa siya ug mahimo siyang mohimo og kaayohan ngadto kang Lazaro – bisag gamiton man lamang niya ang iyang dila sa pagsugo sa usa sa iyang mga suluguon aron tabangan si Lazaro o kumustahon man lamang kini – wala gyod niya kini himoa.

May lain pang gamit ang dila ug kini mao ang pag-awit og nindot nga ho­ni. Dinhi nato makita ang kaanindot sa nakab-ot ni Jessica Sanchez. Apan dili lamang siya. Kitang mga Pilipino gigasahan sa Dios sa pagpanindot sa atong kalibutan pinaagi sa awit. Ang awit usa ka pagpada­yag sa kamatuoran. Mao nga subo kaayo kon kini ga­miton sa pagbugalbugal sa Dios sama sa usa ka babaye nga gitawag og Gaga.

I-ampo nato si Gaga ug mobarog kita pagpaki­ta nga wala ta malipay sa i­yang pagabusar pinaagi sa iyang dila. I-ampo pod na­to ang Impeachment Trial. Hinaot unta gamiton gayod ang dila sa pagsulti sa tinuod.