Editoryal: Mas maayong usa ra

ALEGRE ang eleksyon sa pagka kongresista sa north district sa dakbayan sa Sugbo kon moda­yon sa pagdagan si Anabelle Rama human siya ni­balhin pagparehistro gikan sa Quezon City nganhi sa Cebu City.

Kay kini si Anabelle way pugong pugong sa iyang baba kon mao nay manulti. Sumala gud kon unsay iyang mga pamahayag sa ilang legal nga away sa kanhi aktres nga si Nadia Montenegro sa national television.

Apan duha-duhaan pa kini kay nabahin man ang iyang pamilya. Dunay supak, duna say uyon.

Niadtong supak ug suhito sa kamada sa eleksyon dinhi sa dakbayan, nagtuong bisan si Anabelle nga dunay mga anak nga artistang sila si Ruffa, Raymund ug Richard maglisod batok sa mga del Mar.

Sobra na sa duha ka mga dekada nga naghari ang mga del Mar sa north district ug way bisan usa nga wa nila gilubong sa botos matag piniliay.

Busa kon sa kahoy pa, lawom na kaayo ang mga gamot hinungdan nga lisod lukahon.

Kay lig-on ang ilang kaatbang nga Bando Osmeña Pundok Kauswagan nga naghari sa pulitika dinhi sa dakbayan sa Sugbo sud sa kapin sa duha ka mga dekada, gikinahanglan
nga lig-on ang makinarya sa team Rama.

Aron lig-on, kinahanglan nga usa ra ang buboan og pundo aron maayo ang dagan sa makinarya.

Kon duha ka mga Rama ang modagan dinhi sa dakbayan, maapektuhan ang ilang makinarya.

Kon mobubo man, mas maayong ari na lang gyud sa dunay dako og kahigayunan.