Durano: Aroganteng talawan

PUWERTENG naka­pa­ngan­­­ti ni Chief Justice Renato Corona nga iyang atubangon ang tanang mga pasangil ug alegasyon nga gibato batok kaniya sa impeachment court nga walay bisan gamay nga kakulba nga iyang pagabati-on sa iyang dughan kay siya sayod nga anaa kaniya nakadapig ang hustisya ug kamatuoran.

Apan sa dihang miabot na unta ang kulbahinam nga higayon sa iyang paglimp­yo ug paghugas sa iyang kau­galingon, naunsa ba nga nag­pasagad naman lang og paturagas sa pag-asoy sa iyang mga pasangil batok kang Presidenti Benigno Noynoy Aquino, Ombudsman Conchita Carpio Morales og sa mga Kongresista.

Si Corona ang mipahimulos pagmaayo sa gihatag nga konsiderasyon ni Presiding Officer Juan Ponce Enrile diha sa paghatag kaniya og kahigayunan nga makapabuhagay sa iyang opening statement. Nga nahimo nang letaniya sa mga walay hinungdang mga puntos, mga irrelevant kon wala gyu’y labot sa iyang gi-atubang nga mga articles of impeachment.

Ang naka-alegre kay wala da makuntento si Corona sa iyang pasagad ug paturagas nga pamasangil aron matabunan ang iyang tulubagon. Kay siya ra man usab mismo ang mi-angkon nga aduna siya’y tulo ka peso accounts ug upat ka mga dollar accounts nga wala niya gideklarar sa iyang statement of assets, liabilities and net worth (SALN) kay sa iyang pagtoo, wala siya gi-obligar sa balaud sa pagbuhat niini.

Dayon mihimo sa pagbungat nga iyang pirmahan ang waiver sa pagpa-abli sa tanan niyang mga bank accounts aron nga makita na ang katag ug magkasayranay na kon si kinsa ang mga matinud-anon og si kinsa ang mga bakakon.

Apan paukyab lang diay ni Corona ang maong estorya kay may pakapin mang pisi sa unahan ang mao niyang lakang nga mahimo lamang matod pa niya kining idayon kon ang 188 ka mga kongresista ug senator-judge Franklin Drilon ang mopirma usab og susamang waiver sa ilang bank accounts.

Wala usab nagpa-cross examine sa iyang mga gibuhiang estorya kay nagbuot-buot sa pag excuse sa iyang kaugalingon kay naigo siya matod pa sa hypoglycemia.

Karong adlawa, mipahibawo sa Impeachment Court nga dili na makatambong kay siya ang gi-atiman pa sa intensive care unit (ICU) sa Medical City Hospital sa Pasig tungod sa heart attack.

Sa pagdiga na sa tanang mga baraha ning kintahay isog apan diay talawan, angayan na nga hukman sa senado kining maong kaso aron makapadayon na ang Kongreso sa ilang mas importante pa nga trabaho ug obligasyon ngadto sa mga Pilipino.