Barrita: CJ Corona nisuway og sibat sa Senado?

HUMAN sa iyang kapin sa duha ka oras nga opening statement atubangan sa Senate impeachment tribunal, kalit nga mibarog si Supreme Court Chief Justice Renato Corona ug migawas sa Senate session hall alas 5:07 sa hapon niadtong Martes.

Nakalitan si Senate President Juan Ponce Enrile nga nagtuong nisibat si Corona kay wa pa man siya ma cross-examine ug wa pa i-discharge isip testigo.

Nimando siyang sirad-an ang tanang pultahan sa Senado aron di makagawas si Corona.
Apan wa diay mosibat si Corona. Kakuyapon lang diay siya tungod sa hypoglycemia kun low blood sugar kay diabetison man.

***

Kon tinuod pang nisibat si Corona, di kini madawat ni Senador Enrile kay gihatag sa Senado ug sa mga senator-judges ang tanang respeto ngadto ni Corona isip Labawng Mahistrado sa Pilipinas.

Busa kinahanglan nga respetohan sab ni Corona ang impeachment court.

Mao nga di ma-espeling ang nawong ni Senate President Enrile sa kalit nga pagbarog ni Corona nga way pupananghid.

Matod pa niya, “Nobody can get out of this Senate. I order all the doors closed. I don’t want any defiance of the powers of this impeachment court,” matod sa Senate President.

***

Giangkon ni CJ Corona nga dunay siyay mga dollar accounts nga natigum sud na sa dugayng panahon gikan sa iyang hinagoan.

Ang makapakurat mao ang pagpirma niyag waiver aron mabuksan ug mausisa ang tanan niyang bank accounts ug ang pa-release sa publiko sa iyang statements of assets, liabilities, and net worth (SALN).

“I... hereby waive my right of confidentiality... and authorize all banking institutions to disclose [to] the public any and all information pertaining to all peso and dollar accounts... [I am also] authorizing the clerk of court with permission to release to the public my SALN for the years 2002 to 2011,” matod pa ni Corona.

***

Apan isumiter lang niya kini kon mopirmag susamang waiver ang 188 ka mga kongresista nga ni­pirma sa Articles of Impeachment, lakip na si Senador Franklin Drilon.

“I am humbly asking all 188 complainants from the House of Representatives... and Sen.
Franklin Drilon to join me in this moment of truth as a gesture of transparency and reconciliation of the Filipino people. I am asking them to sign these blank forms and join me sapagkat hiling po ito ng bayan. Let us face the people together,” matod pa ni Corona.

Motukob kaha si Senador Drilon ug ang 188 ka mga kongresista sa hagit ni CJ Corona?

Sa akong tan-aw, way bisan usa kanila nga dunay kaisog nga mopirmag waiver.