Durano: Sobra nga pag-abuso sa diskresyon

MASULUB-ANONG gipahibawo sa kampo sa depensa nga dili mamahimong makabalik si Chief Justice Renato Corona sa impeachment court sulod sa 48 ka oras nga tagal nga gihatag
ni Senate President Johnny Ponce Enrile.

Kini tungod kay ang iyang hypoglycemia ang napun-an usab ug pag-atake sa iyang kasing-kasing nga nagbutang karon sa kakuyaw sa iyang kinabuhi. Mao nga gikinahanglan siyang atimanon sa iyang mga doktor sa tanang higayun sulod sa Medical City sa Pasig City.

Apan bisan pa man ning maong kakulian, gitataw ni Enrile nga dili na sila magpaabot pa kang Corona kon kanus-a kini ganahang mobalik. Kay karong Lunes sa sunod semana, ipahigayon na ang summation sa argumento sa prosekusyon ug sa depensa. Mao nga posibleng unya sa Martes, masayran na sa katawhan ang desisyon sa mga senator-judges.

Sayud sa nagtakilid nila nga kahimtang, si lead defense counsel Atty. Serafin Cuevas ang misuway na unta sa pagpananghid kang Corona nga mo-undang na lang siya sa pagda sa kaso. Apan human gihangyo pagmaayo sa pamilyang Corona, siya miuyon nga ipadayon ang pagpanglaban.

Dugang niini, ang paghatag usab daan og pundasyon sa ilang posibleng pagpalaban
ngadto sa Korte Suprema kon ugaling makadawat og dili paborable nga hukom gikan sa impeachment court, pinasubay sa probisyon sa Section 1, paragraph 2 of Article 8 sa 1987 Constitution nga naghatag sa Supreme Court og “power of judicial review in cases of grave abuse of discretion, amounting to lack or excess of jurisdiction”.

Nila pa, nga bisan og mamugos pa ang prosekusyon nga ang exclusive power sa impeachment anaa gihatag sa batakang balaud sa Senado, hinungdan nga ang ilang desisyon ang gikinahanglang ilhun nga final and executory. Apan kay wala pa ma’y jurisprudence kalabot ning maong punto, kini ang mamahimo gihapon nilang ipadangat ngadto sa pinakataas nga hukmanan.

Ang nakaluod ning maong matang sa binuhatan kay ang mismong pag-abuso sa diskresyon nga gitinguha nga masupil ug mabadlong sa Konstitusyon, mao naman hinuo’y gikabay-an ning sa mga kanahan.

Humana gipatuyangan si Corona sa impeachment court sa iyang mga gusto ug kapristo sa ngalan sa inter-brach courtesy og due process of law. Unya midagan ug mitago na karon sa tambalanan kay nalisang nga mapangutan-an. Mao nga wala na gyuy angay nga siya paundayunan, kay siya man ang abusado ug dili kay ang hukmanan.