Editoryal: Gimik

MIANGAL si Mayor Michael Rama sa gibuhat ni Kongresista Tomas Osmeña nga mao ang pagsul-ob og polo shirt nga dunay ngan niya sa likod apan sa ubos, mayor ang titulo, inay representante siya sa south district.

Nakuhaan og hulagway ni Alan Tangcawan, photo contributor sa Sun.Star Superbalita, si Osmeña nga namulong atubangan sa iyang mga sakop sa Bando Osmeña Pundok Kauswagan (BOPK).

Nagbansiwag sa mao nga hulagway ang marka sa iyang polo shirt. Mahimong tulo ang interpretasyon niini. Una, siya gihapon ang mayor sa dakbayan kay iya man ang mayoriya sa konseho nga mosunod lang bisan unsay iyang mando ug gusto.

Ikaduha, pagpahibawo nga modagan sa pagkamayor sa 2013. Iya lang kining gipaagi og pasumbi­ngay apan nangampanya na diay.

Ikatulo, mao ra gyud ang pagpalagot sa kontra.

Apan kining iyang gibuhat nagpakita lang sa iyang ka arogante kay himuon niya ang bisan unsa basta iyang gusto.

Bisan tuod kon kaatbang na sila ni Rama sa 2013, apan nagbaton lang unta siya og delicadeza ug respeto kay bisan unsaon, di pa man siya ang mayor sa dakbayan sa Sugbo.

Kana kon modaog sab lagi siya.

Hinuon, kining iyang minaldito karon mahimo sab nga sinyales sa iyang kahadlok sa popularidad ni Rama mao nga bisan unsa na lang nga gimik ang iyang nahuna-hunaan.