Nalzaro: Atik ni Corona

MARUNONG ug marama kining mga inilang mga tawo. Basta medyo ma-apiki sila labi pa kon prisohunon, kon dili mo-eskapo, magpasakit-sakit dayon. Sa panahon ni kanhi Presidente Joseph Estrada, sa dihang gidakop siya gumikan sa kasong plunder human mahugno ang iyang pamunoan, nagpasakit-sakit dayon. Maoy hinungdan nga gibutang siya ubos sa hospital arrrest. Diha siya temporaryong gipa-ubos sa hospital arrest sa Veterans Memorial Hospital nga mao usab karon ang gibutangan ni kanhi Presidente Gloria Macapagal Arroyo tungod sa kasong electoral sabotage nga gi-atubang niini.

Sa wala pa mabutang si Arroyo sa Veterans Hospital, didto siya na-confined sa St. Lukes Medical Center kay nagkasakit (o nagpasakit-sakit) human mopagawas og orden de aresto ang korte batok kaniya. Nagpa-ubos usab sa hospital arrest si kanhi Agriculture Secretry Jocelyn Bolante, kadtong gipasanginlan nga responsable sa pagpagawas og dakong pundo nga fertilizer scam. Si kanhi Comelec chairman Benjamin Abalos nagpasakit-sakit usab sa dihang dakponon na. Si PBMA Supreme Master Ruben Ecleo Jr., nga karon wanted na, gitugutan nga makapiyansa kaniadto gumikan kay matod pa talandugon ang kahimtang sa iyang panglawas.

PANGLAWAS NI CORONA

Mao usab kini karon ang gigamit nga taktika ni Supreme Court Chief Justice Renato Corona. Human sa iyang halos tulo ka oras nga nagpadayag sa iyang habig atubangan sa mga senator-judges niadtong miaging Martes, kalit lamang dayon kining mibiya sa witness stand human mo-ingon, ‘This is Chief Justice Renato Corona I wish to be discharged’. Dayong barug ug gawas sa courtroom. Nahingangha and tanan apil na si Senate President ug presiding officer Juan Ponce Enrile. Bisan man gani ang mga abogado ni Corona.

Sa dihang gipugngan siya sa pagpagawas, kalit lamang nga naluya si Corona. Human sa pipila ka minuto nga negosasyon, mibalik kini sa courtroom nga nag-wheelchair na ug yongyong na ang necktie ug minghoy na ang nawong. Gimanduan ang iyang mga abogado ni Enrile nga pabalikon pagka-ugma (niadtong Miyerkules). Apan wala kini mobalik kay nagpa-ospital na. Daghan ang wala na motuo ni Corona kay sila nagduda nga nagdrama lang siya. Sa ato pa na nga pinulungan, “nag-atik-atik” lang siya.

HADLOK

Maayo na lang gani nga masinabtanon ang impeachment court ug gihatagan gihapon siya og igong lugway. Karon Lunes ang gihatag nga tagal sa mga senator-judges kang Corona aron mopatim-aw didto sa impeachment court ug mosubmiter sa iyang kaugalingon sa direct ug cross examinations. Pasagdi na lang nang direct examination kay puwede man na nga dramahon niya ug sa iyang mga abogado. Kanang cross examination kay diha nimo mahibaw-an kon namakak ang usa ka tawo.

Unsa man mahadlok o dakong insulto sa iyang kaugalingon kay chief justice siya unya i-cross examin lang og usa ka yanong abogado? Aw, unsaon nga siya man ang akusado ning maong kaso, di, agwanta siya. Kon wala siyay gitagu-an, hala bisan pa adto sa tiilan ni Hesu Kristo bati-batihon ug bali-balihon siyag cross eksamin.

(bobby.nalzaro@yahoo.com)Sent from my iPad