Mongaya: Testimonya ni Corona

NAA diay P183.2 milyones si Chief Justice Renato Corona sa iyang peso ug dollar accounts sa mga bank nga wa gitaho sa statement of assets, liabilities, and networth kun SALN.

Kini maoy giangkon ni Chief Justice Corona dihang nibalik siya sa Senate Impeachment Court aron moesplikar pila ang iyang kwarta nga naa sa banko.

Niangkon siya nga duna ray $2.4 milyones siya ug di $10 milyones nga naa sa iyang dollar accounts. Dayon nanghimakak nga dunay 82 ka dollar account kay kuno upat ra ang iyaha. Duna sab siyay P80 milyones nga deposit nga peso.

Gibuhat kini ni Chief Justice Corona sa pagbalik niya sa Senate Impeachment Trial diin nangayo sab siyag pasaylo sa nahitabo sa miaging Martes dihang ni-walkout siya.

Kay ang isyo nga gitan-aw sa Korte mao man ang wala pag-sumiter ni Chief Justice Corona og SALN nga sakto ang mga entry, niesplikar siya nga tungod kini kay dunay balaod kabahin sa confidentiality sa mga dollar deposit ug kining mga kantidad sa ihyang mga deposit di iya tanan. Apil sa tag-iya sa iyang mga deposit mao ang iyang asawa ug mga anak.

WAY PRUWEBA

Ang klarong kahimtang nga naa kini sa iyang pangalan. Ug sa dugay nga panahon, nitago siya sa giingong bank secrecy law. Wa niya kini gibutang sa SALN.
Ang pag-angkon niya nga iya kining mga account nga wa sa iyang SALN nagpasabot nga sakto diay ang pasangil sa prosekusyon.

Duna ba siyay pruweba nga wa siya mamakak nga di iyaha ang maong kantidad? Wala. Nagsalig lang siya nga kini maoy testimonya sa Chief Justice.

Ah, mura man sab og bana nga nasakpan sa asawa. Dayon moinsister ang laki nga wala siyay sala ug angay siyang tuohan bisan ug ang asawa dunay nakit-ang pruweba ug ang bana walay pruweba sa iyang pamahayag.

MGA CONDO

Niangkon sab si Chief Justice Corona nga duna siyay lima ka mga kabtangan nga wa ma-report sa SALN. Sayop kuno ang pasangil nga 45.

Niinsister siya nga gigamit sa tibuok kagamhanan ang tanan aron lang matangtang siya sa kagamhanan tungod sa daghang mga rason. Alang kanako, maunsa man ang rason sa administrasyon ni Pnoy, nakita nato nga dunay igong hinungdan sab nga makumbikto si Chief Justice Corona.

Ambot lang kon ingon niini ba ang pagtan-aw sa mga senador.

DRUGLORD

Usa sa dakong hinungdan nga nagkadaghan ang mga panglungkab, panglabni, ug ubang mga klasi sa krimen mao kining pagsanay sa bisyo nga ilegal nga drugas.

Tuod man, dunay mga dakop sa mga tiggamitan og shabu o marijuana ug dunay mga pusher nga maapil. Apan kanus-a man nga dunay dagkong mga drug lord nga masikop ug matanggong gyud sa prisohan? Di ba, igo lang kini silang padug-on aron tinuod nga hayahay ang mga tinugyanan?

Mao kiniy akong pangutana sa kahimtang diri sa Syudad sa Talisay nga naa sa habagatan.

Karong bag-o, naabot sa atong atensyon ang reklamo ngadto sa PDEA sa usa ka yanong lungsoranon kabahin sa usa ka FS nga giingong druglord sa maong dapit.

Ang pangutana: moaksyon kaha ang PDEA nga makaayo sa lungsod? Ila ba lang kining pasagdan? O gamiton alang sa ilang kaayuhan? Apil ba ang PDEA karon sa suliran sa drugas o sa solusyon?

Hmmm, angayan nga ang lungsod magbantay kon unsay mahitabo niini.

(politika2013.wordpress.com)