Durano: Sumbanan

HUGTANONG namali­bad si Pangulong Benigno Aquino III nga dili siya mopirma og waiver sa iyang mga bank accounts tungod kay: (1) wala na kini gikinahanglana kay daan naman siyang misubmitir sa iyang SALN (Statement of Assets and Liabilities and Net Worth sukad pa kaniadto og hangtod karon ug (2) dili siya kiko ni Renato Corona nga mosayaw sa gipatugtog niini nga sonata.

Apan si Senador Allan Peter Cayetano sa iyang bahin kinsa nagtuo nga ang impeachment ni Corona gikan sa pinakataas nga puder sa hudikatura ang nagdala sa bag-ong kahigayunan sa kausaban sa kultura sa panerbisyo sa atong gobyerno.

Diin ang gibalewala ug gisalindot lamang nga konsepto kaniadto sa pagmakatinud-anon ang nahatagan na karon og kahigayunan nga mabanhaw ug hugot nga himuong sumbanan sa mga alagad sa katawhan.

Dungan niini ang iyang paghagit kang Presidente Noynoy sa paghimo og kamanduan sa iyang mga kabinete ug sa tanang mga empleyado sa kagamhanan sa pagpirma og waivers unya ang dili mo-sign, gikinahanglan na nga mo-resign.

Maoy pagtuo ni Senador Cayetano nga obligasyon ug kaakuhan sa Pangulo sa iyang gisugdang kampanya batok sa kurapsyon nga mopakita og leadership by example diin siya mismo ang lantawon nga sumbanan sa mga tanang mga taga gobyerno.

Ang Statement of Assets, Liablities and Net Worth (SALN) igo lamang naghatag sa sumada sa tanang kuwarta, utang ug kabtangan nga gihuptan sa usa ka opisyal o empleyado sa gobyerno. Wala niini gidetalye ang pangalan sa banko diin gideposito ang kuwartang gitipigan.

Kay transparency man kaha ang atong gipangita, nganong mangita man og lusot nga kaagian ang mga tigpasiugda ning maong kampanya? Ang pag-abli sa kaugalingong pundo usa ka buhat sa pagdasig sa tarong ug limpyo nga pagpanerbisyo sa nasud ug dili maayong isipon nga tua gipahinungod kang Corona.

Gawas pa, ang palusot nga nahadlok ang Malakanyang nga gamiton lamang sa katuyuan sa harassment ang waiver wala’y sukaranan. Kay mismong sila si Kongresista Neri Colmenares ug Kongresista Teddy Casino daan namang namirma og waivers. Pero nila pa, kini ang adto man isangon sa Ombudsman ug dili kay ipasagad lamang sa paghatag kang bisan kinsa.

Sa katapusan, maayo tingaling atong balikan ang panultihon nga ang panudlo nga kutob lamang sa estorya apan wala sa buhat. Usa ka patay nga matang sa pagtulun-an ug dili gyud mahitabong magdala og maayong resulta sa atong kaliwatan.