Editoryal: Magkadena ang pinatyanay

LAIN na sab nga mga kinabuhi ang nakalas sa dak­bayan sa Carcar tungod sa laing bayolente nga hitabo. Kon may kalambigitan ba kini sa pagpatay sa anak ni Mayor Nicepuro Apura, kini gisusi pa sa kapulisan.

Apan may kalambigitan ba o di, ang pagpamusil di maisip nga isolated nga kaso tungod kay hagbay pa man intawon nang insidente sa pinatyanay sa mao nga dakbayan.

Di na maihap sa mga tudlo ang mga kaso sa pagpatay sa mao nga dakbayan busa di matawag nga ang mga hitabo isipon dayon nga isolated kay posibleng dunay kalambigitan. Hayan kutay kini nga mga hitabo kay dunay mga grupo nga nagbaslanay.

Kon gusto man gyud ang mga opisyal sa dakba­yan nga mahunong ang mga pagpatay, maghiusa sila, uban kang Mayor Apura, sa pagpangitag paagi aron kini masulbad.

Magpahigayon og usa ka tigom aron hisgutan ang mga paagi aron kini mahunong.

Di lang kini ordinaryo nga problema sa peace and order, taliwa sa mga hungihong nga dunay gamhanang mga tawo nga nagpaluyo sa armadong mga grupo diha.

Kon isalig lang ang tanan sa mga pulis ug manghunaw ang mga opisyal sa Carcar, di gyud maundang ang mga pinatyanay diha.

Dugang pang dugo ang mobanaw kon magpadayon ang pagbugti og kinabuhi matag dunay makalas.

Magkadena unya ang pinatyanay.