Nadela: Ipa-enrol ang wa pa ma-enrol

KINAHANGLAN nga way mauwahi o mahabilin. Ang tanang mga tinun-an kinahanglan ipa-enrol ug di tugutan nga dunay maglaroylaroy sa kadalanan. Mao ni nasabtan nako nga programa sa DepEd nga angay nga suportahan sa mga ginikanan. Bahala gud kon pasanginlan mo nga nagpa enrol og anak aron lang dunay kabinlan nga mao ang classroom nga maoy suki kaayo sa ubang mga inahan.

Basta ma-enrol lang, bahala na ang mga magtutudlo kon unsay labok sa mga bata karong Lunes, ilabi na kadtong mao pay pagtungtung sa Grade One. Pero ang mga ginikanan unta di mo makalimot sa inyong res­ponsibilidad ngadto sa inyong mga tinun-an. Di mahimo nga ihurot lang ninyo og salig sa mga maestra ang inyong mga anak. Kinahanglan naa mo kanunay sa panahon nga kamo gikinahanglan. Naa mo kanunay pagpahimangno kanila unsay sakto ug dili. Labaw sa tanan, paggiya kanila sa inadlaw nga panginahanglan sa ilang eskwelahan.

MARIGONDON

Natandog ko nga nagsud-ong sa mga bata nga nag-alirong sa tabay nga nahabilin sa dapit diin nahitabo ang demolition duha na ka mga semana ang nakalabay. Didto ni sa Sitio St. Joseph sa Barangay Marigondon, Lapu-Lapu City.

Si Renel Escobido, tinun-an sa Grade 3 sa Marigondon Elementary School, nanghangyo og school supplies nga wa pa gyud mapalit sa iyang mama. Ang-ang man og mao ra ni ilang siguruon nga nangita pa man gani sila og dapit nga mahimo nila nga permanenting kapuy-an human sa demolition. Kuarenta y dos ni silang tanan nga mga bata nga na-enrol apan sa school supplies, sila nanawagan pa.

CARAVAN

Ang caravan ni Mayor Mike Rama nga akong nakuyugan sa pipila ka eskwelahan nagkompirmar sa daghan kaayong kakulangan nga ako nang gi-report dinhi. Nag-una sa listahan mao ang way klarong koral nga mao say ampay sa mga kawatan. Ika duha mao ang mga pansayan nga hilabihan sa ka baho kay gawas nga puno na, kuwang pa gyud sa tubig.

Daghan pa og nalista ang mayor pero alang nako di sab mahimo ihurot na lang ni og salig sa mayor. Kinahanglan nga ang mga ginikanan ug magtutudlo mopalig-on sa ilang puersa paghinahinay og tutuk ning maong mga problema.

Ang barangay angay sab nga manginlabot. Apil na ang mga pulitiko. Syaro naman sab di mo kahinumdum nga sa mga eskwelahan baya mo gibotaran.