Editoryal: ‘K to 12’

LAING importanteng panid sa kasaysayan sa sistema sa edukasyon sa nasod ang mopakli karong adlawa, ang pagsugod sa tuig tingtugha 2012-2013.

Ang Department of Education (DepEd) mapa­ngahason sa pagsugod sa “K to 12” program nga nag-usab sa naandang 10-ka-tuig nga sirkulo sa batakang edukasyon — unom sa elementarya ug upat sa sekondarya.

Sa “K to 12’, ang kindergarten obligado nang kuhaon sa mga bata ug mahimong kabahin sa sirkulo hinungdang mapuno kini sa unom ka tuig sa elementarya. Upat ka tuig sa junior high school ug duha sa senior high school. Busa, ang sugyot nga modelo sa DepEd mao ang K 6-4-2.

Sugod karon, ang grade 1 mao na kadtong niagi na sa kindergarten. Ang mosulod nga freshmen sa sekondarya mosunod na sa junior high curriculum ug sila ang unang makabenepisyo sa senior high school nga hingpit ipatuman sa tuig tingtungha 2016-2017.

Ang “K to 12” nagtutok sa batakang mga suheto sa edukasyon ug ang senior high school, naka­tutok sa technical-vocational ug natad sa arte, preparasyon sa iyang pagsulod sa kolehiyo o pwede nang makatrabaho tungod sa igong abilidad nga nakat-onan.

Sa pagkakaron, daghan pang kalibog sa sektor sa akademiya (mga tinun-an, ginikanan, magtutudlo o bisan tagdumala sa tunghaan). Hinuon, normal kini matag sugod sa usa ka kabag-ohan.

Apan nagpadayon ang daghang kwestiyon. Pag-usab ba sa sikulo maoy tubag sa kalidad nga edukasyon? Wa pa matubag ang batakang pangina­hang­lan sa eskuwela — ang tinuig nga problema sa kakuwang sa lawak, materyal sa pagtuon, magtutudlo — dili ba kaha kini mosamot na hinuon?

Matod ni Bro. Armin Luistro, kalihim sa DepEd, ang “K to 12” gipatuman aron patas nga ilhon ang atong graduates sa ‘global education.’

Unsay linugdagangan ning tanan, naa sa matag usa kanato ang pagharong sa kamatuoran. Goodluck!