Editoryal: PNoy milubad na?

NAHUKAS na og hinayhinay ang pagtakuban ni Pres. Benigno Aquino III sa giingong pagkamatinud-anon sa pag-alagad sa katawhan ug sihag sa pangagamhanan.

Human sa makasaysayanong pagkatangtang ni Chief Justice Renato Corona sa impeachment court sa miaging semana, ang panawagan sa pagbutyag sa publiko sa mga kabtangan sa tanang opisyal sa kagamhanan nagkakusog.

Si PNoy mismo walay lipudlipod sa iyang pag-akusar kang Corona nga giingong nagtago og mga kabtangan ug dakong bahandi labi na sa dolyares.

Mga kaalyado ni PNoy mao ang ninggaling pag-ayo ni Corona sa impeachment trial hinungdan nga nawiwi pag-ayo sa publiko bisan ang labing personal nga kinabuhi sa kanhi sa labing taas nga pangulo sa Hudikatura.

Apan, ang mga kabtangan ug bahandi ni Corona napamatud-an sa impeachment court dili kinawkaw sa kagamhanan, gikan sa adunahang pamilya.

Gihukman siya sa mga senador-huwes nga sad-an tungod sa kasaypanan nga wala niya pagbutyag sa iyang Statement of Assets, Liablilities and Networth (SALN) bahin sa “tukma nga kantidad,” bisan dili kini impeachable offense.

Ug nilagda si Corona og waiver nga natugot na sa pagsusi sa iyang tanang bahandi apan nihagit sa usab sa tanang opisyal sa kagamhanan, labi na kang PNoy, paglagda og waiver.

Apan si PNoy nikakak. Nikaon sa iyang pulong sa panahon sa kampanya sa pagka presidente nga ehemplo sa sihag nga kagamhanan.

Ang mga kaalyado ni PNoy nga nagduot kang Corona, ning-ababida na usab sa posisyon sa ilang agalon, sukwahi sa ilang posisyon sa impeachment trial, matod pa, takos sa “privacy” ang presidente?

Salingkapaw ang tanan. PNoy, milubad na?