Espinoza: Abyon nauntog, hapit madiskaril sa airport

WAY DISPENSA. Niadtong Biyernes (Hunyo 1), hapit ma­diskarel ang eroplano sa Cebu Pacific nga akong gisakyan gikan Cebu padulong dakbayan sa Butuan. Abi nako mao nato ang katapusan. Salamat kaayo nga wa pa motugot si Lord.

Unsa kahang hitaboa nga sa padung nag-landing ang eroplano kalit lang nga nauntog, murag gibundak, ang eroplano sa runway. Sa akong pangagpas namiskalkulo sa piloto ang pag-landing tungod kay nag-uwan man gamay.

Pagkauntog gyud sa eroplano, nitakingking dayon sa tuong dapit maayo gani kay nakabalanse ang eroplano ug nabalik tul-id iyang dagan sa runway. Ang mga babayeng pasahero sa akong likod labihang siyagita samtang nasige og ampo.

Tungod sa kalit nga pagka­untog sa eroplano, nisakit ang tuong dapit sa akong kilid.

Imbis nga mangayog dispensa sa insidente, ang gibuhat sa stewardess ang pagpangayog pasay­lo lang gyud nga nadelatar og usa ka oras ang biyahe.

Apan ang piloto wa gyud motingog bisag “Eeekkk” na lang o bisag moingon na lang pasensya mo mga pasahero kay di makita ang runway tu­ngod sa ulan. Tuod nag-ulan apan makita pa ang runway sa airport sa akong bintana.

Paita sa Cebu Pacific no? Nadelatar na og usa ka oras ang among pagbiyahe, giundak o antog pa gyud ang eroplano paglanding sa Butuan city airport hinungdan sa grabeng kakuyaw namong mga pasahero.

Hinuon, way hungog nga piloto nga iundak o diskarel ang eroplano nga iyang gipolotohan kay apil man sad ang iyang kinabuhi. Apan human sa makuyaw nga hitabo nahibung kaming mga pasahero nganong wa motingog ang piloto.

Nagduda na hinuon kaming mga pasahero nga nasayop o nasipyat siya sa pag-landing. Sus kon nasaghid pa sa runway ang pako sa eroplano sa tuong dapit morag maugdaw mi kay naa man sa pako sa eroplano ang gasolina.

Pasalamat kog dako sa Ginoo nga way dautan nahitabo namong mga pasahero. Moi­ngon ko nga kusog kaayo nga pagkaundak sa eroplano tu­ngod kay nangahagbong man ang emergency oxygen mask sa ulohan sa mga pasahero.

Atong pangutan-on ang mga awtoridad sa Air Transportation Office (ATO) nga ubos sa Department of Transportation and Communication (DoTC) kon unsay responsabilidad sa piloto ug sa Cebu Pacific sa ingon ato nga insidente.

Naa koy nakaestorya nga biyahedor usab nga nakasinati siyag ingon ato nga hitabo apan, matud pa niya, ang piloto sa PAL nangayog pasaylo sa mga pasahero sa di maayong paglanding sa eroplano.

Ang kahimtang sa piloto kon wa ko masayop og dungog Capt. Nieva mora sad sa usa sa mga cashier sa Smart Communications nga istriktang maestra ang dating dihang nagbayad ko sa akong binuwan nga bayranan sa akong cellphone.

Nangayo kog pangatahuran sa booth sa cashier nga way tawo gibadlong ko sa gwardiya.

Miingon ko maayong gabii, way mitubag. Ang gwardiya ngilngig sad kay nangayo’g daghan impormasyon nako nga igo ra man ta ko mobayad. Paita ning mga dakong kompaniya nawala na ang giingon nga customer care.

****

CORONA. Maestorya na man nato ron dag komedya human makonbikto si kaniadto SC Chief Justice Renato Corona sa Impeachment Court nga bisan sa iyang pagpamakak sa unahan apan migawas siyang matinud-anon sa uwahiay.

Tungod sa iyang pag-angkon nga duha ra ang iyang US dollar account sa banko ug dili 82 siya mismo ang mihatag og ebidensya nga wa mapakita sa prosekusyon aron siya matangtangan nga hepe sa hustisya sa Korte Suprema.

Maayo unta ingon ana ang tanan mga empleyado sa gobyerno ug pulitiko nga motug-an gyud sa tinuod bisan og namakak sa unahan. Apan bisan si Presidente Noy Aquino morag mikakak og dili motug-an sa iyang deposito sa banko.

Kon dili si PNoy mopakita sa iyang deposito sa banko samot nang dili motug-an ang mga senadores ug mga kongresista sa ilang mga dagkong deposito sa banko. Akong duda maayo lang moyawyaw si Sen. Miriam Santiago apan di usab motug-an sa iyang mga deposito.

(elespinoza53@yahoo.com)