Nalzaro: Padayon Gwen

SA pinaka-uwahing survey nga gipagawas sa Pulse Asia sa mga senatoriables, anaa na sa ika-32 ka puwesto si Gov. Gwen Garcia. Napulo ka ang-ang ang iyang nalaktawan. Kay niadtong unang survey anaa man siya sa ika-42. Niadtong higayona wala pa siya modeklarar nga modagan pagka-senador. Bag-o pa siya naka-desisyon nga mosalmot sa nasudnong pulitikanhong kalihukan. Nalakip na siya sa senatorial line up sa United Nationalists Alliance (UNA) nga gipangulohan ni Vice President Jejomar Binay.

Na-expose na usab si Gwen sa national TV gumikan sa iyang mga interviews ug ingon man sa iyang pagsu­roy-suroy sa nagkalain-laing lugar sa nasud sa iyang mga speaking engagements ginamit ang kuwarta sa mga magbubuhis ning lalawigan. Aw, layo pa kaayo ang official campaign period ug ingon man ang eleksiyon. Busa dako pa kaayo og kahigayonan ang halandong gobernador nga maila sa tibuok Pilipinas ug mahinumduman siya sa mga botante inig abot sa adlaw sa piniliay.

DI PA GYUD MOTUO

Kana kon mopadayon ba gyud siya. Kay hangtod karon, kuwang pa sa pagtuo nga molahos kini si Gwen sa paglansar sa pagkasenador. Nagduda ko nga mobalik kini sa lokal nga pulitika ug modagan sa pagkakongresista sa tersero distrito. Usa sa mga tima-ilhan niana mao ang iyang pagbalhin sa iyang voter’s registration sa lungsod sa Barili.

Nganong mibalhin man siya nga puwede man gihapon siyang magpabilin didto sa Dumanjug nga ubos sa segundo distrito?. Kon dili mosaka ang ratings ni Gwen sa mga
senatoriables, dako ang akong pagtuo nga mobalik siya sa lalawigan.

Hinumdumi nga 12 ra baya ang pili-on. Unya naa na daan ang mga re-electionist nga misulod nang daan sa magic 12. Unom na sila kabuok nga maoy nag-una sa survey. Pun-an pa sa mga sikat ug popular kaayo nga mga ngalan ubos sa lineup unya sa partido sa administrasyon nga mao ang Liberal Party. Aw, basin sunod survey naa na si Gwen sa ika-29. Unya inig magkadoul na ang eleksiyon na na siya sa ika-15. So, hapit na. Busa padayon ug abante pa, Gobernador. Wala nay atrasay ha? Bantay baya ha?

NANGANDAM NA

Nunot ning ambisyon ni Gwen sa nasudnong pulitika ug ning pagdagan unya ni third district Congressman Pablo John Garcia pagka-gobernador, mabakante unya ang congressional position sa maong distrito. Ania kining grupo nga mituboy ug andam nga mosuporta kang Provincial Board Member Alex Binghay nga maoy ilang pakandidatuhon pagka-kongresista sa maong distrito. Gani ani na kining grupo nga misuporta kaniya nga gitawag og ABC o Alex Bingay for Congress. Andam ug tagana usab si Binghay nga modawat sa maong hagit. Kinsa ba god kuno siyang mobalibad kon maoy kagustuhan sa haring lungsod? Sakto gyud ka, Board. Padayon sa imong plano.

(bobby.nalzaro@yahoo.com)