Editoryal: Mga kasong medikal

DUHA ka mga kasong medikal ang nabaniog sa Sugbo ning semanaha ang nangangkon nga cosmetic surgeon ug ang dentista nga gikiha tungod sa pag-ibot sa ngipon sa bata.

Duha ka babaye nga imbes magpaseksi, naa­piki hinuon human nanghubag ang ilang sampot dihang nipaubos sa giingong medical procedure sa nagtakuban nga doktor, kinsa nadakpan sa usa ka operasyon sa awtoridad.

Ug nasuta sa Professional Regulation Commission (PRC) nga ang suspek, Gloria Rabor, wala sa ilang listahan ug tataw nga dili doktor. Gawas pa, nakuhaan kini og mga ilegal nga drugas.

Si Rabor, gipriso karon, walay lisensya sa paghimo sa trabaho sa usa ka cosmetic surgeon busa nag-atubang siya og kasong illegal practice ug ilegal nga drugas.

Samtang, kaso sa usa ka dentista nilambo ngadto sa korte tungod sa pag-ibot sa duha ka mga atubangang permanent teeth sa usa ka siyete anyos nga bata niadtong 2003.

Ang mga ginikananan sa bata nikiha og kasong reckless imprudence resulting in serious physical injuries batok kang Dr. John Sidney Ricamora, kinsa ni-plead not guilty.

Padayong gihusay sa korte ang duha ka mga kaso.

Ang maong mga kasong medikal naghatag og dakong leksyon sa publiko --- dili magpataka og sumi­ter sa kaugalingon ngadto sa walay klarong medical practitioner aron lang makabarato.

Ang doktor nga may plastadang klinika o naa sa ospital ug mo-charge sa tukmang professional fee timailhan nga kasaligan kini sa paghiling sa imong lawas.