Nadela: Suwerte ang mga nagpuyo sa patag

PAESKWELAHON apan mag- ­tinapulan. Resulta way makat-unan. Kong way makat-unan, asa man padung? Siyempre, adto padung sa way kabangkaagan ug sa pagpuyo magkapangka-pangka pagpangita og lung-agon. Mao ni mga panahom sa katigulangan nga di gyud nako makalimtan.

Ang pulong tapulan di malalis mao gyuy nakaingon nganong daghan ang wa makatapos sa pagtuon ug pakyas pagkuha og kurso. Duna sab hinuoy balidong rason ang uban nganong nabiyaan sila sa panahon kong edukasyon maoy hisgutan.

Pero kasagaran nga rason nga akong mabati mao kining kawad-on. Pobre, kabus, timawa ug bisan unsa nalang nga katarungan nganong idlas kaayo ang uban pag gahin og panahon aron maka eskwela. Basin baya ang katapulan maoy tinuod nga hinungdan?

BAKTAS

Sa pagbukas sa klase niadtong Lunes, didto ko nagpadistino sa bukid. Ako maoy naniid sa dagan sa unang adlaw sa pagbukas sa klase. Sa bukid sa Sibugay daghan nako’g naagian nga mga bata nga nagbaklay. Ang uban kuyog nila ang ilang mga inahan. Pag-abot nako sa may Cantipla, nisamot kadaghan sa mga tinun-an ang nagbaktas.

Ang grupo ni Renalyn Bontilao ang akong nasugatan. Nagbaklay sila padung sa Taptap Integrated School. Matod ni Renalyn subra sa usa ka oras nga sila maglakaw aron lang makaabot sa ilang eskwelahan. Sa ato pa subra sa oras sa buntag, subra sab sa oras sa hapon. Pagkapait.

Didto sa ilang classroom akong nahimamat ang ilang teacher nga si Ma’am Merlyn Ardimer. Akong nasayran pinaagi sa iyang paambit ngadto sa mga bata, siya sab diay nagbaktas aron lang makahuman og high school.

Matod ni Ma’am, magbaklay siya gikan sa Taptap padung sa Adlaon diin nahimutang ang high school sa iyang panahon. Nindot kaayong paminawon ang sugilanon nga gipaambit ni Miss Ardimer, og manghinaot ko nga makadugang kadto sa kadasig sa mga tinun-an nga sa matag adlaw kinahanglan pa nga magpasingot og tagpila ka oras aron lang makakat-on sa leksyon sa ilang magtutudlo.

Mao nigiingon nga kong tapulan ka, ambot og asa ra ka kutob. Basin pilmerong semana ra sa klase ang imong matambongan sa pagtungha. Mao nga makaingon ko nga pagka suwerte ning mga tinun-an nga nia sa patag, ilabi na kadtong dunay masakyan nga jeep sa ilang pagpadung og pagpauli gikan sa eskwelahan. Itandi sa bukid nga puwerti pang tugnawa, di sayon ning magbaklay taliwala sa baga kaayo nga gabon.

Mao nga gisuwayan nako og subay ang sakyanan sa barangay nga kaniadto gipagamit aron mahakot ang mga tinun-an nga nagbaklay. Sa tinud-anay lang, kadtong estorya nako sa TV Patrol sa miaging tuig nga naghisgut sa mga tinun-an nga gisuwayan og panamastamas ang hinungdan nganong gipadagan sa taga Barangay Tabunan ang ilang trak, gawas nga makapahulay ang mga bata sa pagbaklay.