Bañoc: Ilogay sa propaganda

NIMANDO na si Mayor Michael Rama sa pagtangtang sa tanang illegal nga streamers ug posters sa nagkadaiyang mga publikong lugar sa dakbayan sa Sugbo.

Bisan ang posters sa iyang apohan nga si anhing Don Vicente Rama ang apil nga tangtangon aron motak-om na ug tagawtaw si Cebu City South District Congressman Tomas Osmeña.

Kahinumdoman nga ang mga dumadapig sa Bando Osmeña Pundok Kauswagan (BOPK) wala nakauyon sa mando ni Rama nga tangtangon ang mga “Type O” posters ni Osmeña. Ang “Type O” nagkahulogan og “Type Osmeña.”

Ang katarungan ni Rama nga ang iyang gihimo agig pag-implementar sa ordinansa nga nagdili sa pagbotang sa streamers ug posters nga naghatag ug hugaw sa dakbayan.

Apan ang BOPK miingon nga kon seryuso pa si Rama nga kalimpyuhan ang dakbayan sa a illegal nga streamers ug posters, nganong wala man pod niya gipatangtang ang posters sa iyang apohan?

Si Rama niingon nga gawas nga naghatag og kahugaw ang “Type O,” klarong kabahin na sa sayong pagpangampanya sa BOPK.

Kini wala gihimakak sa mga opisyal sa BOPK gawas sa pag-ingon: “Unsa man diay nang posters ni Don Vicente Rama, dili na pamolitika?”

Apan ang tubag ni Rama: “Nganong namolitika man intawon nang akong apohan nga dugay na man nang patay?”

Pastilan gyud sa mga politiko. Iyahay lang og diskarte kay duol na ang piniliay.
Kon si Rama ang pasultion: “Type O is not my type.”

Kon si Osmeña: “Team Rama is not my team.”

Kay hapit na man ang piniliay, iyahay na nga pauk­yab ang atong makit-an sa
nagkadaiyang mga politiko. Mga pahumot nga propaganda ang ilang gihimo ngadto sa mga botante.

Kahinumdoman nga nakahimo sab og tabi-tabi ang “Buy One Take One” nga advertisement nila ni Osmeña ug Bise Mayor Joy Augustus Young.

Dali rang nahilom ang mao nga advertisement kay ang ig-agaw ni Rama nga si Basak San Nicolas Barangay Kapitan George Rama nakapanaway ug ingon: “Unsa man nang buy one take one, ukay-ukay?”

Ang mga paukyab sa duha ka mga kampo ang kabahin lang sa talan-awon sa wala pa nahinog nga politika sa nasud.

Maayo siguro nga dili kining mga binata nga gimmick ang gamiton sa BOPK ug Team Rama.

Kon gusto silang mahumot sa katawhan, ilang ipa­kita ang maayong serbisyo. Kon gusto silang mahumot sa katawhan, ilang ipakita ang maayong serbisyo.

Sakto si Rama sa iyang giingon: “Layo pang politika, trabaho una ta.” Iya kining pamatud-an pinaagi sa saktong implementasyon sa mga batakang serbisyo sakatawhan.

Mas maayo nga si Osmeña dili lang diha kutob sa “Type O”. Mas makaayo sa katawhan nga iya sab nga ati­manon ang “Type S” o Type Serbisyo diha sa Kongreso.