Nalzaro: Pag-uswag sa barangay elections

ADUNAY nag-ung-ong ka­ron nga balaodnon nga mag-postpone o mag-uswag sa barangay elections ngadto sa 2016 og idungan na kini sa presidential ug local elections. Ang sunod unta nga eleksiyon sa barangay karong sunod tuig sa buwan sa Oktobre human usab sa midterm election sa Mayo 2013. Matod pa ni Senate President Juan Ponce Enrile kinsa diri karong bag-o nga posibling ma-aprobahan kining maong sugyot balaodnon kay nauyunan man sa liderato usab sa Kamara Baja.

Kon mahitabo kini, dag­hang mga barangay officials ang malipay niini. Tiaw ba nimo kanang malugwayan ang ang termino hangtod sa 2016. So, aduna pay laing upat ka tuig.

Pero nga­nong i-uswag pa man god ni nga okey na man nang tagutlo ka tuig nga termino.

Taas ra kaayo ka­nang terminoha alang sa mga opisyal sa barangay nga walay maayong performance.

GASTO

Unsa pa man god ang problema aning eleksiyon sa barangay nga idungan man sa presidential election. Ang tumong aning mga pulitiko mao nga dili lang gyud sila gustong mogasto. Inig eleksiyon sa Mayo, mogasto sila sa ilang kaugalingon. Unya pagka Oktobre mogasto na usab sila kay ang mga mokandidato sa barangay adto man magyango-ngo nila sa funding. Grabe usab og gasto ang barangay election unya asa man manguha og campaign funds ang mga kandidato? Mo-ingon ta nga non-partisan ang barangay. Asa ka non-partisan nga mamulitika halos naman.

Kon mahinayon ni, puwerting daghana ang botohan. Ang mga illiterate niini maglisod bisan kon computerized elections. Tapulan ang uban nga mobutar sa tanang posisyon. Sa mga botante lang sa Cebu City, 20 kapin ang butaran. Presidente, Bise Presidente, dose ka senador, usa ka kongresista, mayor, bise mayor, walo ka konsehal, barangay captain, pito ka konsehal, SK chairman ug partylist. Ang mahitabo ania, lakturan na lang ang uban. Mas taas didto sa probinsiya.

TRABAHO SA KAPITAN

Ang trabaho sa kapitan niadtong mga 60s ug 70s mao ra gyud ang paghusay og dunay mag-away sa iyang barangay. Didto sa among barangay sa Olingan, Dipolog City, akong uyuan ang kapitan. Kon duna siyay husayon, iyang manduan ang mga isig ka partido nga magdala og manok. Iyang ipa-ihaw unya mangaon sila. Busa magka-uliay gyud sa maayong kabubut-on. Usa ka adlaw niana, natingala siya nga wala nay nag-away sa iyang barangay. Iyang gipasusi, sus, nahutdan na og manok ang iyang barangay mao nga wala nay nagpahusay.

(bobby.nalzaro@yahoo.com)