Banoc: Luistro, ‘maluoy ka’

NAPASMO sa kagu­tom ang 250 ka mga magtutudlo sa kindergarten sa dakbayan sa Sugbo gumikan kay wala pa nila madawat ang ilang suweldo sulod na sa lima ka sunudsunod nga buwan karong tuiga.

Ang ilang suweldo nga P6,000.00 matag bowan war a gani maka abot sa minimum nga suholan sa Sugbo ug nga ubos lang intawon sa kategorya nga honoraria ang wala pa nila madawat sukad pa niadtong buwan sa Pebrero hangtod ning bowana.

Kaluoy ba sab sa mao nga mga magtutudlo. Un­say pagtuo sa taga Department of Education (DEPED) ngadto nila, puthaw ug tinai?

Akong nahinabi sa akong programa Straight to the Point sa dyHP si Dr. Carmelita Dulangon, regional director sa DepEd 7.Gipasabot ni Du­langon nga trabaho sa mga division superintendent nga ihikay ang honoraria sa mga magtutudlo aron dili kini malangay sa pagkuha.

Giangkon ni Dulangon nga ang nahitabo sa 250 ka mga magtutudlo sa kindergarten nagsilbing pahigmata sa iyang buhatan aron sa pagsusi sa ubang mga tunghaan sa Tunga-tungang Kabisay-an nga posibleng duna say mga magtutudlo nga nakasinati sa susamang problema.

Gumikan sa naasoyng problema, walay lipud-lipod nga nanawagan si Cebu City Mayor Joy Augustus Young alang sa pagpakanaog ni DEPED Secretary Armin Luistro sa iyang puwesto.

“He should resign for implementing ‘K to 12’ because knows he is fooling the Filipino people and he is going to be responsible for the suffering of the whole nation,” matud ni Young.

Kini ba tinuod ang sukli sa ahat nga pagpatuman sa K to 12 ni Luistro?

Ubos sa mao nga programa, ang pagtungha sa usa ka tuig sa kindergarten ang unang rekesito aron dawaton ang bata sa pagtungha sa Grade I.

Busa, gikinahanglan kaayo ang serbesyo sa mga magtutudlo sa kindergarten isip kabahin sa pagpatuman sa mao nga programa.

Apan ingon ani ba kagidlay ang implementasyon sa ‘K to 12’ nga pasmuhon na lang ang atong mga magtutudlo sa kindergarten?

Unsaon man intawon sa paglahutay sa mga magtutudlo sa ilang trabaho kon wala silay suweldo? Bisan gani panday, maningil man sa iyang suhol human sa usa ka adlaw niyang trabaho.

Magtutudlo pa kaha nga giubu-ubo na ug tinudlo sa mga kiat nga mga bata?

Kay wala may suweldo, manghilam-os sa utang ang mga magtutudlo ug daotang maapektohan ang ilang pagtudlo sa mga bata.

Karong adlawa, mobisita sa Sugbo si Luistro. Gipasalig ni Dulangon nga iyang ipaabot ni Luistro kining mao nga problema.

Mr. Secretary Luistro, sir, limang buwan na na walang sahod ang 250 na mga guro sa kidndergarten sa Cebu City. Kunting awa lang po para sa ating mga guro.