Nadela: Ang saag nga bala sa Minglanilla

WA GYUD ko masayop sa akong pagduda nga kuwang sa labok ang kaso nga gipasaka sa kapulisan sa Minglanilla batok sa usa ka tawo nga ilang gituhoan nga responsabli sa kamatayon sa subra sa tuig nga batang babaye sa maong lungsod.

Saksi ko sa pagduso sa kaso ngadto sa piskaliya sa niaging Huebes. Sa dihang nangutana ang taga prosecutor’s office kong asa ang resulta sa paraffin test og ang report mahitungod sa slug way ika tunol si SPO1 Renato Masangcay.

Matod niya, ang resulta sa paraffin madugay pa. Tuod man gibasura sa piskaliya ang kaso og gibuhian ang suspek nga si Candelario Caneda. Si Candelario hugtanon nga nihimakak sa pasangil nga nagpabuto siya sa iyang riple ug ang slug didto nitugpa sa atop sa panimay sa pamilyang Opsima sa Barangay Lipata.

Sa akong pagbisita sa ilang panimay nakita nako ang buslot sa ilang atop nga sin. Ang slug nilahos ngadto sa uloo sa ilang anak nga si Charice nga naglingkod sa basiyo sa lata pintal. Akong gisusi ang panimay ni Candelario nga may igo sab nga gilay-on gikan sa panimay sa mga Opsima, ang iyang mga silingan nitug-an nga wa sila makadungog og buto sa oras nga giingong natugpahan sa slug ang bata.

KINSA kaha?

Kong di si Candelario kinsa may nagpabuto? Posibli ba nga ang slug nag gikan sa mas layo pa nga dapit?

Matod sa mga ginikanan sa bata, makonsensya unta ang naghimo sa ingon. Apan kong way konsensya ang kriminal, siguro di na nato huwaton nga siya motahan sa kapulisan.

Kadtong may kasayuran labot sa krimen unta makonsensya sab.

Sa pikas nga bahin, manghinaot ta nga nunut sa pagbasura sa piskaliya sa kaso, di sila moundang pag-imbestigar aron mahatagan sa gipangayo nga hustisya ang kamatayon ni Charice. Sayod tang tanan nga dinhi sa ato nagpasad lang ang nagkadaiyang matang sa armas. Ug sayod sab ta nga dunay daghang iresponsabling tag-iya og mga armas nga magpataka lang og pabuto.

Magpabuto sa ila lang gusto. Ma bag-ong tuig o di ang ilang armas nga makamatay gihimo
nilang kalingawan nga moresulta sa kagul-anan sa uban.

PILDERO

Hangtod karon wa pa molurang ang estorya labot sa kapildihan ni Manny Pacquiao. Kauban sa nagsigi og estorya mao kadtong mga pildero sa dakong sugal nga nahitabo sa niaging Dominggo.

Ang uban napildi sa lugro nga ma-down si Timothy Bradley sa ikaunom nga round. Duna say apildi sa lugro nga di kaabtan og 10-round si Bradley. Sa certified nga sugarol, wa pa matapos ang sugal. Sa NBA, ang duwa sa Oklahoma ug Miami na sab ang ilang gikabuangan.