Lariosa: Mga kapitan mobahakhak

DI mapugngan ang bahakhak sa mga barangay kapitan kon mahinayon nga sa 2016 ang eleksiyon sa mga opisyal sa barangay. Kay mosatong silag lain nga tulo ka mga tuig sa pangatungdanan.

Ang mga kurakot magpadayon sa pagpangawkaw sa salapi nga di ilaha. Ang mapahimuslanon matagbaw sa pagpamintaha. Ang mga mayor makaginhawag dako kay di na makagasto. Kay bag-o pa mang nahabwa ang ilang salapi tungod sa eleksiyon nianang panahuna.

Maayo tuod kini sa mga kapitan nga salawayon, apan pag-antos sa ilang mga konstituyente nga nasamplita sa ilang kangil-ad. Sa han-ay sa mga kapitan dinhi sa
nasod naglabi ang mga badlungon.

Anaay mga kapitan nga motambong lang sa sesiyon. Inigkahuman pauli sa ilaha sa siyudad o sa layong dapit morag nagbiyag bunot, Isalig lang sa unang konsehal nga iyang tawo o sinaligan.

Ang uban naa man tuod sa barangay magpuyo, apan way klarong mehoras. Ang klaro mora gyud ang ilang pagpanghambog sa ilang gahom. Tungod kay nadutlan gamiton kini pagpanalipod aron makakuwarta sa mga dautang pangita sama sa drug pushing, masiao operation, tigbakay ug uban pa.

Tinuod maayo ni sa mga matarong ug kugihan nga mga kapitan nga daghag kaayuhan nga nahimo. Nindot man gani nga kini sila di ilisan hangtod gyud sila pul-an. Sa ato pa, kapitan for life.

Ang dautan sama sa sagbot angayng purilon. Di hatagag higayon sa pagkatay. Kining lindog uyon kaayo nga unya na lang sa 2016 basta ilisan ning mga badlungong kapitan pinaagi sa pagtudlo pg lain nga maoy manimunil sa barangay. Tawo nga tarong, buotan, ligdong ug gitahod sa barangay ang ipuli.

Kini ang baruganan ning lindog nga ang balaod mohatag gahom ni PNoy pagpanudlo og interim nga mga kapitan hulip sa mga badlungon. Natural ang mga tarong ipabilin ug di hilabtan.

Kinsa man ning mga badlungon? Kadtong may mga kaso, may illegal nga patigayon, mga protektor sa mga drug pushing ug gambling sama sa jueteng ug masiao nga misiaw karon bisan asa.

Kadtong non-performing o nagmika lang sa katungdanan o kadtong nag-agap lang sa sweldo labi tong barangay nga daghan ang negusyo o industriya. Ning dapita dako kaayo ang kamkam ang mga barangay opisyal.

Ang kongresong mabuot maghunahuna unta niini. Di kay larga pasagad lang. Pasagdan nga ang mga barangay magkabulingit nga unta kini ang punoan man sa pangagamhanan dinhi sa atong nasod.

SAYRI Kini. Kinsa toy nahibawo sa adres ni Gemelo Cadiz dinhi sa siyudad palihog kontaka ning maglilindog cel # 09239092798. Niay langyaw nga nangita kaniya kanhi iyang katrabaho sa gawas sa R&B Falcon Deep Water International Drilling Resources, Inc. Kansas, USA.