Lonzon: Mayor wa magserbisyo?

MASUK-ANON nga misumbong kanako ang usa ka yanong magbubuhis sa lungsod sa San Fernando, probinsya sa Sugbo, dihang iya kung nakit-an ug giduol sa usa ka dapit sa siyudad sa Sugbo.

Ang iyang kasuko batok sa ilang mayor nga si Abe Canoy, diri gipahungaw kanako. Kay wa man kunoy kamatuoran ang gipasiatab sa mga tawo nga suod nga higala sa mayor sa mga maayo niining nahimo sa ilang lungsod.

Matod sa iyang reklamo wa mag­serbisyo sa katawhan sa San Fernando si Canoy, kay panagsa ra nga igkita ug mas taas ang panahon niini didto sa gawas sa nasud. Iyang gidugang nga ang igsuon sa mayor mao karon nagpadagan sa lungsod.

Dugang sa iyang reklamo nga sud sa 20 ka tuig way nahimo ang mga Canoy? Karon dunay proyekto apan mao ang pagpabarog sa bag-ong buwangan kay giilisan ang daan.

Sa akong tan-aw, grabi gyud ang kasuko sa yanong magbubuhis nga mipahungaw sa iyang kadismaya.

Kon tinuod ang reklamo ug pasangil, ang akong mabasol ang mga tawo nga mibotar sa ilang mayor. Nganong gitagaan pa man ug dugang termino o bag-ong termino kun wa pay nahimo sa lungsod sa San Fernando.

Sa akong pagsuwat niining lindog nangita ko og paagi kun si kinsang tawo nga makuhaan nako og kasayuran aron makahatag og cell number sa mayor aron sa pagkuha sa ilang habig. Napakyas sab ko sa pag-open sa website sa ilang munisipyo aron makita kun unsa may ilang mga programa ug proyekto nga napatuman.

Kon nuntan ang reklamo, maayo og mopahuway nalang sa katungdanan si Canoy ug ihatag ngadto sa uban kun wa siyay panahon sa ilang lungsod.

BARANGAY MOVEMENT

Daghan ang wa masayud sa mga maayong gihimo niining maong grupo kay kuwang lagi og exposure ug pag-abag sa uban. Mao nga ato silang tabangan aron madasig ang matag usa kanato hilabi na gyud sa pagprotehir sa kalikupan.

Nakadayig ko sa gihimo sa Abante Barangay Movement nga gikuyogan ni kanhi DOTC Usec Totol Batuhan. Kay mihimo silag kalihukan pinaagi sa pagpananom og kahoy niadtong Hunyo 9, didto sa Barangay Babag 1, siyudad sa Sugbo, subay sa kasaulogan sa World Environment Day.

Ang nakanindot kay ang seedlings nga ilang gi­tanom naglakip sa avocado, guyabano ug cacao nga gawas nga mapuslan aron makaon di pa delikado sa illegal logging.

Kining kahoy gawas nga makapugong ug makatabang sa pagsanta sa flash floods, landslide, soil erosion mao sab kini ang tinubdan sa oxygen aron sa pagginhawa. Hilabi na karong panahuna grabi na kaayo ang kainit tungod sa climate change.

Didto sab diay atol sa tree planting activities uban sa Abante Barangay Movement ang Red Cross, Kauban, Abante Youth ug Instrumental Independent Clan. Mao nga atong mapaabut nga duna pay madugang nga grupo aron mohatag sa ilang suporta sa mga kalihukan nga sama niini.

Kanindot sa ilang tema kay gitawag kini og “Kalikupan panggaon ta! Mananum kita!”

(efren_lonzon@yahoo.com; 0932­7380888)