Barrita: Duna bay napriso og 240 ka tuig?

USA ka taho ning atong pamantalaan nag-ingon nga usa ka tawo nga gikonbikto sa kasong rape o pagpanglugos gihukman nga mosilbi sa unom ka reclusion perpertua.

Sanglit ang reclusion perpetua mao man ang pagkabilanggo gikan sa 20 ka tuig ug usa ka
adlaw ngadto sa 40 ka tuig, nag-ingon ang taho nga mapriso ang maong tawo hangtod sa 240 ka tuig. Wa pay tawo nga niabot og edad nga 240 anyos. Sa ato pa, klarong wa pay napriso og 240 ka tuig.

Unsa man gyud ang gidugayon sa mga silot nga pagkabilanggo ubos sa Revised Penal Code?

Kon atong mahinumdoman nga ubos sa mga special laws, ang labing taas o bug-at nga silot mao ang life sentence kon pagkabilanggo asa tibuok kinabuhi. Atong tagsa-tagsaon ang mga sentensya sa Revised Penal Code kay Kinatsila ang mga temrino nga gigamit.

Ang kinatas-an sa Revised Penal Code mao ang reclusion perpetua o hangtod sa 40 ka tuig nga pag­kabilanggo.

Apan tagsa rang makaabot sa 40 anyos sa prisohan. Sumala sa Article 27, Revised Penal Code, “Any person sentenced to any of the perpetual penalties shall be pardoned after undergoing the penalty for thirty years, unless such person by reason of his conduct or some other serious cause shall be considered by the Chief Executive as unworthy of pardon.

Gani, kadtong masentensyahan og reclusion perpetua kutod ra sa labing dugay 30 ka tuig sa prisohan kay ang balaod mismo nagmando nga kina­hanglan nga hatagan siyag pardon sa pamuno nasod gawas kon modesidir ang pangulo nga di siya angayan nga hatagan og pardon.

Ang sunod nga silot mao ang reclusion temporal, pagkabilanggo gikan sa 12 ka tuig ug usa ka adlaw ngadto sa 20 ka tuig. Samtang ang prision mayor molungtad og gikan sa unom ka tuig ngadto sa 12 ka tuig.

Ang prision correccional ug destierro molungtad og gikan sa unom ka buwan ug usa ka adlaw ngadto sa unom ka tuig.

Ang destierro mao ang pagpalayas sa usa ka tawo gikan sa dapit nga iyang gipuy-an ug pagdili kaniya sa di pagtaak sa gilay-on nga di molabaw sqa 250 ka kilometro ug di momenos sa 25 ka kilometro gikan sa iyang kanhi gipuy-an.

Ang arresto mayor molungtad og usa ka buwan ug usa ka adlaw ngadto sa unom ka buwan samtang ang arresto menor molungtad og usa ka adlaw ngadto sa 30 ka adlaw.

(Ang atong paghisgut-hisgot mahitungod sa balaud madungog na matag karon ug unya sa mga tampo nga dunay punto legal ngadto sa tulomanon nga “Alang Kanimo Kapuso” nga gisibya gikan sa ala-una ngadto sa alas dos sa hapon sa sibyaan DYSS Superadyo sa RGMA network.)