Durano: Pagawi sa tinuohan

KUSGANONG gi-awhag ni Archbishop Emeritus Ricardo Cardinal Vidal ang tanang mga tumotuo nga mohimo sa pagbarug sa pagsupak sa giduso nga balaudnon ni Kabataan Party-list Congressman Raymond Palatino nga nagtinguha sa pagdili sa pagbutang og mga imahe sa bisan unsang sekta sa tanang mga opisina sa kagamhanan. Apil na ang pagdili sa pagawi sa bisan unsang kalihukan nga may kalambigitan sa relihiyon ug pagtuo.

Maoy pagtuo ni Cardinal Vidal nga ang maong balaudnon kun makalusot sa Kongreso ang dili lamang maka-apektar sa aspeto sa relihiyon kun dili lakip na usab niining maligsan ang kultura ug tradisyun sa atong kaliwatan.

Sa iyang bahin si Kongresista Palatino ang mipa­sabot nga dili ang simbahang Romano Katoliko ang iyang girumbo sa mao niyang balaudnon. Hinunua, igo lamang niyang gibuhat ang iyang gipanamupaang katungdanan isip usa ka kongresista sa atong nasud.

Diin klaro nga nakalatid sa Section 5, Article 3 sa 1987 Constituion: “No law shall be made respecting an establishment of religion or prohibiting the free exercise thereof.

The free exercise and enjoyment of religious profession and worship, without discrimination or preference shall forever be allowed.”

Niya pa nga gikinahanglang ipatuman kining maong kamanduaan sa atong batakang balaud unya gawas pa, wala man niini gidid-an ang paghimo sa buhat pinasubay sa pagtuo sa atong katawhan.

Igo lamang nilang gibutang sa ensaktong lugar ang pagbuhat sa pagpadangat sa serbisyo sa mga buhatan og ahensiya sa gobyerno. Unya ang pagsimba ug pag-ampo ang adto usab pagabuhaton sa simbahan ug sa uban pang lugar nga tuyong gigahin alang sa pag-ampo.

Ang kagawasan sa relihiyon adunay duha ka aspeto: (1) ang pagtuo sa gustong tuohan og (2) ang pagbuhat og pagawi subay sa maong tinuohan. Ang pagtuo nga anaa sa estado sa huna-huna wala’y kinutuban og limitasyun busa gawasnon ang usa ka tawo sa pagpili sa iyang gustong toohan o pwede man usab gani nga wala gyud siya’y tuohan.

Apan ang pagawi na sa gisubay nga pagtuo ang gi­butangan og limitasyun sa atong gobyerno. Dini gikinahanglang dili kini kontraryo og supak sa atong balaud, kostumbre, moralidad, public order og public policy.

Ang pagbutang sa mga imahe sa mga ahensiya sa gobyerno wala makapanghilabot sa katungod sa uban nga dili gustong mo-ampo. Labaw na nga ang pagpahigayon og misa og uban pang mga relihiyosong kalihukan nga makatabang sa values formation ang gihimo sa pinugsanay nga kamanduan. Busa wala’y angayang ikasakit si Palatino nga nalapas na ang iyang gitamdan nga probisyon sa konstitusyon.

Ambot og nakasabot ba kaha usab intawun siya nga ang mao niyang tinguha nga ban on religious images and activities sa mga public offices ang direkta na usab nga nagyatak sa prohibition sa konstitusyon diha sa pagpig-ot sa free exercise of religion?