Editoryal: Problema sa trapiko

MAAYONG matubag ang gamot-hinungdan sa problema sa grabeng kahuot sa trapiko sa dak­bayan labi na ning panahon nga tingklase na -- ang sobra kadaghan sa sakyanan ug wala maayong pagkaplano nga sistema sa kadalanan.

Daghang sugyot alang sa pagpaluag sa trapiko.

Usa sa giduso sa kampo ni Kongresista Cutie del Mar sa Amihanang Distrito sa Sugbo mao ang pagtukod sa daghang flyover. Apan, gikuwestiyon kini tungod sa kadako sa gasto ug dili malungtaron nga solusyon sa problema.

Kay moabot gihapon ang panahon, sama sa nahitabo sa kasamtangan, nga matrapik gihapon sa flyover atol sa rush hours.

Dunay sugyot nga paghimo og light rail transit (LRT) nga motubag unta sa batakang hinungdan apan, dako gihapon og dakong salapi sa proyekto ug dili maisip nga dinaliang solusyon.

Ang pagtumaw og balik sa sugyot nga Bus Rapid Transport (BRT) naobserbahan nga mas minos og gasto ug daling mapatuman subay sa kasinatian sa pipila ka dakbayan sa ubang nasod nga susama og kahimtang sa karaang sistema sa kadalanan sa Sugbo.

Kon ipatuman ang BRT sa Metro Cebu, maayo hatagan og igong konsiderasyon ug mapahiluna ang panginabuhi sa kabus nga mga drayber sa public uti­lity jeepneys (PUJs). Segurado nga sila ang direktang maapektohan sa proyekto tungod sa pagbabag unya kanila sa pagsulod sa sentro sa dakbayan.

Maapektohan ba usab niini ang nagkadag­han nga pribadong sakyanan? Kinahanglang dunay halapad nga konsultasyon sa publiko sa pagpatuman sa kausaban sa transportasyon.

Nasayod kita nga ning sayo pa lang, kinahanglan nga dunay mapangahason nga kausaban sa pagdumala sa trapiko tungod sa paspas kaayong pagtubo sa Harang Dakbayan sa Habagatan.